500 JOs, casuals sa Cebu City Hall di na i-renew
CEBU, Philippines — Ubay-ubay nga mga kawani sa Cebu City Hall ang mawagtangan og trabaho sugod karong sunod buwan human gianunsyo kini ni Cebu City Mayor Michael Rama kagahapon sa buntag atol sa flag raising ceremony.
Matud pa sa mayor 500 ka job order ug casual nga mga empleyado ang wala gi-renew ug dili na kinahanglang mo-report sugod karong Hulyo 1.
Pasabot niya nga kun wala gani appointment dili nalang sila moahat og trabaho gumikan kay segurado nga dili gyud gihapo sila masuweldohan.
Ang criteria sa gihimo nga ebalwasyon sa mga empleyado kinahanglang dili kini kawatan, intrigera, tapulan, hugawan, palaaway, walay nahibaw-an, dili mobayad og utang, ug mobuko-buko og kauban.
Gusto mayor nga mahimong tulin ang pagdumala sa siyudad uban sa mga tawo nga motrabaho gyud subay sa ilang mandato.
“My directive, akong balikon, my directive, 500 employees, by July 1st need not have to come to the city hall anymore. In other words, I have directed our HR and City Administrator on a very clear guidelines that I have set and need not have to repeat it,” sumala pa sa mayor.
Patabangon
Gipahibalo usab ni Rama nga dunay mga bag-ong ipang-hire nga patabangon niya sa pagdumala sa kagamhanan sugod karong Hulyo 1 partikular na sa pipila ka mga departamento.
Usa niini ang kanhi kapitan sa Barangay Agsungot nga si Jong Jong Alcover maoy padalhon sa peace and order program sa dakbayan ug mohimo kini og koordinasyon kang Konsehal Phillip Zafra ug sa umaabot nga chairman sa CITOM Board nga si Koko Holganza.
Si Architect Yumi Espina maoy mohulip ni Engr. Kenneth Enriquez sa City Planning Office. Mobalik si Enriquez sa pagtrabaho sa City Engineering Department nga pagadumalaon ni City Administrator Susan Ardoza.
Gitudlo usab ni Rama si Atty. Jhonson Hontanozas nga motabang sa pag- oversee sa mga operasyon sa City Legal Office.
Si Wynne Jagmoc Cenas maoy mohupot sa Market Operations Division hulipan niya si Raquel Arce kinsa mao nay mangulo sa City Disaster Risk Reduction and Management Office.
Gipahibalo usab ni Rama nga patabangon niya sa iyang administrasyon ang sikat nga international designer nga si Kenneth Cobonpue .
Gusto ni Rama nga susama og corporate world ang pagdumala niya sa City Hall nga magbutang gyud og tawo nga haom gyud sa ilang mga posisyon.
Nagkanayon si Rama nga susama og Singapore ang mahimong senaryo sa Siyudad sa Sugbo.
“I am very happy that we have private sector, a world renowned entrepreneur and creative who will be helping our administration, not my administration, but our administration,”dugang pa ni Rama.
Sa miaging semana , nasigpatan usab nga nibisita sa buhatan ni Rama ang aktres ug film director nga si Suzette Ranillo kinsa giingong hatagan sab og papel sa siyudad sugod karong Hulyo 1.
Sa nangaging interview , gibutyag usab sa mayor nga tahasan sab si kanhi konsehal Erik Espina sama sa trabaho ni Communication Secretary Martin Andanar. —IBM (BANATNEWS)
- Latest