Sweldo sa youth workers ipadali sa konseho

CEBU, Philippines — Gihangyo sa konseho sa siyudad sa Sugbo ang buhatan sa mayor pinaagi sa Department of Manpower, Develop and Placement (DMDP) nga dalion ang pagproseso ug pag-release sa sweldo sa mga beneficiaries sa Special Program of the Employment of Students (SPES).

Si Konsehal Nestor Archival maoy ni-sponsor sa resolution labot niini nga giaprubahan sa konseho.

“Complaints have reached this representation’s office that up to date the beneficiaries under Batch 3 have not yet received their respective allowance for the services they rendered”, sigon ni Archival.

Suma ni Archival ang dinalian nga pag-release sa sweldo gikinahanglan sa mga beneficiaries ilabi na nga hapit na mahibalik ang face-to-face classes sa umaabot nga school year.

Dunay budget nga gitagana alang sa sweldo sa mga beneficiaries sa SPES nga gihatag sa kagamhanan sa siyudad pinaagi sa DMDP.

Ang SPES usa ka Department of Labor and Employment’s youth employment -bridging program nga gitumong aron maghatag og temporaryo nga trabaho sa mga kabus apan deserving students panahon sa summer o Christmas vacation.

Lakip sa nipahimulos niini mao ang mga out-of-school youth OSY ug mga dependents sa mga nawad-an og trabaho aron makatabang sa pamilya ug ang mga beneficiaries makapadayon sa eskwela.

Ang qualifications aron mahimong kabahin sa programa mao ang nag edad og 15 anyos apan dili mosobra sa 30 anyos. Adunay combined net income human sa tax sa parents, apil sab ang iyaha, kun pananglitan, wala nilapas sa regional poverty threshold; adunay passing general weighted average (GWA); ug sa OSY kinahanglan certified sa local Social Welfare and Development isip OSY. — /MEL (BANAT NEWS)