DEPW motutok sa paghuman sa mga kasamtangang proyekto

CEBU, Philippines — Ang Department of Engineering of Public Works (DEPW) nagkanayon nga hatagan nila og dakong pagtagad karon ang pagpahuman sa mga kasamtangamg  proyekto ilabi na ang flood control projects diha sa nagkadaiyang barangay.

Base sa taho sa Cebu City Public Information Office nga sa  pagsugod sa bag-ong administrasyon ni Mayor Michael Rama  usa sa mga hatagan og pagatagad mao ang mga  proyekto pagtubag sa hulga sa baha sa siyudad.

Nagakanayon si  Engineer Danny Richard Urot sa planning division nga tiwason nila ang wala pa nahuman nga mga proyekto ilabi na ang mga flood control projects diha sa nagkadaiyang barangay sama sa Barangay Guba, Kamputhaw, Labangon, Luz, Lorega-San Miguel, Poblacion Pardo, Sambag II, Paril, Tabunan, Tisa, ug Tejero. Adunay himuon usab nga drainage ug line canal, catch basin ug cross drainage sa mga barangay sa San Jose, Tinago, Basak Pardo, ug Capitol Site.

Adunay construction usab sa  taytayan diha sa Sitio Baogo, Barangay Paril ug ang taytayan diha sa Barangay T. Padilla kay ayohon usab sa DEPW.

Ang DEPW mopahigayon usab og pagsemento sa mga kadalanan sa Barangay  Mabini, Mambaling, Pamutan, Paril, Santa Cruz, Cambinocot, Kalunasan, Suba, Tagba-o, Taptap ug Hipodromo. Ipaubos usab sa road  concreting ug rehabilitasyon sa pipila ka dalan sa Barangay Basak Pardo, Pasil, Tinago, Budlaan, Kalunasan, Sambag 2, Buot, Carreta, Guadalupe, Sudlon 2, Binaliw, ug Buhisan.   Sayo pa, gipadayag sa kagamhanan sa Siyudad sa Sugbo nga importante kaayo ang pagpaayo sa kadalanan aron mahimong hapsay ug tulin ang pag-agi sa mga motorista.

Nag-agad usab ang DEPW alang sa dugang mga proyekto nga maaprobahan sa mga sakop sa konseho sa siyudad.

Sa laing bahin, hatagan usab og unang pagtagad ni  Mayor Junard “Ahong” Chan  sa Dakbayan sa Lapu-Lapu ang pagsulbad sa nasinati nga mga pagbaha, suliran sa trapiko  ug ang pagpaayo sa mga naguba nga dalan sa siyudad. Romeo T. Limpangog/BDB (BANATNEWS)