Lapu-Lapu mihingusog sa kampanya batok dengue
CEBU, Philippines — Gihingusgan karon sa kagamhanan sa siyudad sa Lapu-Lapu ang ilang kampanya sa pagsumpo sa pagkuyanap sa dengue.
Si Dr. Agnes Realiza, pangulo sa City Health Office sa Lapu-Lapu miingon nga gikan sa Enero 2022 hangtud karong mga panahona ilang natala ang 667 ka mga kaso sa dengue og 12 usab ang ilang natala nga namatay niini.
Matud pa ni Realiza nga hangtud sa Mayo 7, 2022 maoy ilang natala ang 438 ka mga kaso sa dengue.
Lakip sa gihimo sa kagamhanan mao ang massive education drive ngadto sa kabarangayan ug ingon.man ang paghatag og kasayuran sa publiko sa mga pamaagi sa pagpugong sa dengue.
Naglakip sa gihatag nilang kasayuran mao ang Action Barangay Kontra Dengue nga naglakip sa self- protection, early consultation ug ingon man support spraying o misting sa pagpugong sa mahitabong outbreak.
Ang mga barangay diin natala ang mga kaso sa dengue mao ang barangay Basak nga adunay 119 ka mga kaso, Mactan 58 ka kaso, Pusok 46, Canjulao 45, Bankal 43, Gun-ob 42, Calawisan 32, Pajo 31 ug Buaya adunay 29 ka mga kaso sa dengue.
Nunot niini si Mayor Junard Ahong Chan kusganong nag-awhag sa mga molopyo sa kabarangayan sa pagpanglimpiyo sa palibot ug sa pagbungkag sa mga dapit nga mahimong kapuy-an sa mga lamok nga nagdala sa sakit nga dengue. —/MEL (BANAT NEWS)
- Latest