P31 nga umento sa suholan insult sa mamumuo?

CEBU, Philippines — Ang dugang sa suholan nga P31 sa Central Vsayas gilantaw sa Alyansa sa mga Mamumuo sa Sugbo-Kilusang Mayo Uno (AMA Sugbo-KMU) nga insulto sa mga mumumuo.

Kini ang gibutyag ni Jaime Paglinawan, chairperson sa AMA Sugbo-KMU.

Si Paglinawan niluwat sa maong pamahayag human ang Central Visayas Wage Board niaproba sa P31 nga usbaw sa basic pay sa rehiyon diin mas ubos kini sa wage increase sa Western Visayas nga P55 ug P110.

Matud ni Paglinawan nga dako kaayo nga insulto sa mga mamumuo ang giaprobahan nga wage increase tungod kay mahal kaayo ang palaliton sa rehiyon-7 ug dili na kapaigo ang minimum wage.

Si Paglinawan nagkanayon nga ilahang gihangop nga adunay wage increase tungod kay sulod sa duha katuig karon pa adunay pagsaka sa suholan apang ang maong kantidad gamay ra kaayo ikompara ngadto sa Western Visasayas hinungdan nga dako kaayo ang ilang kasagmuyo diin insult kini sa mga trabahante sa Central Visayas.

Si Paglinawan nagtuo nga ang P750 national minimum wage makabuhi kini sa pamilya sa mamumuo pamilya nga adunay dignidad.

Nunot niini, lain-lain usab ug reaksiyon sa mga Sugbuanon diin kasagaran kanila dili pabor sa P31 nga umento gumikan kay mahal na kaayo ang mga palaliton.

Samtang si Cebu City Mayor Michael Rama nagkanayon nga nakasabot siya sa nagkadaiyang reaksiyon kalabot sa wage increase sa rehiyon nga P31.

Giawhag niya ang mga negosyante nga tumanon ang maong kamandoan ug naglaom siya nga mangita og paagi ang nasudnong kagamhanan nga dili usab maapektohan ang mga negosyante niini.

Matud ni Rama nga susihon una niya ang posibilidad sa tax amnesty aron matabangan ang mga negosyante.

Apan kinahanglan kini og lapad nga pagtuon tungod kay dili usab siya gusto nga maapektohan ang paghatag sa basic services ngadto sa katawhan diin sa buhis nagikan ang pundo niini.

Samtang si Charles Kenneth Co, presidente sa Cebu Chamber of Commerce and Industries nipadayag nga dili sila maglaom  og massive layoffs tungod kay ma-manage ra ang bag-ong  wage increase.

Matud ni Co nga mga negosyo karon mo-focus sa pagpasaka  sa ilang  productivity ug output aron matapakan ang ilang labor cost.

Ug ikalipay usab nila kon adunay mahitabo nga tax amnesty. —Sanden J. Anadia/BDB (BANATNEWS)