Rama: Pagpabakuna magsilbing panagang sa laing variant
CEBU, Philippines — Nagtuo si Cebu City Mayor Michael Rama nga kon ang tanan mabakunahan ug makadawat sa ilahang booster shots sa COVID-19 vaccine magsilbi kini og panagang aron dili mataptan sa laing variant sa Omicron nga mao ang BA.4.
Ang Department of Health nipahibawo sa niaging adlaw nga ang Pilipinas nakatala og unang kaso sa COVID-19 Omicron sub variant BA.4 gihulagway nila nga “variant of concern”.
Si Rama nimando sa iyang mga sakop nga dili mokompiyansa ug magpadayon sa pagpamakuna kontra COVID-19.
Ang pangulo sa Emergency Operations Center Cebu City Konsehal Joel Garganera nagkanayon nga gikinahanglan nga mo-coexist sa COVID-19 diin bisan unsa nga klase sa variant malikayan kondili lang molugak sa pagdepensa sa kaugalingon aron dili matakdan sa virus.
Subling giawhag ni Garganera ang katawhan nga dili gyud mokompiyansa bisan og padayon nga nikunhod ang kaso sa COVID-19 sa Dakbayan sa Sugbo.
Matud ni Garganera nga ang mga tawo sa Cebu City nituman gihapon sa basic health protocols sama sa saktong pagsul-ob og face mask ilabi na kon anaa sa enclosed nga mga establisamento. —BDB (BANATNEWS)
- Latest