Amnestiya sa pagbayad og buhis giuyonan nga lugwayan

CEBU, Philippines — Giuyonan sa Committee on Laws, Ordinances, and Styling sa Cebu City Council nga aprobahan ang gisugyot nga pag-amendar sa City Ordinance No. 2572 aron malugwayan ang amnestiya sa pagbayad og buhis.

Kini aron mahatagan og dugang higayon ang mga magbubuhis sa pag-atiman sa ilang buhisanan.

Hinuon, girekomenda sa komite ang pagpahigayon sa public hearing alang sa gisugyot nga ordinansa sa dili pa kini ipaubos sa ikaduhang pagbasa.

Ang City Ordinance No. 2572, nga gimugna ni Konsehal Raymond Alvin Garcia, giaprobahan niadtong Agosto 14, 2020. Kini gitumong aron matabangan ang mga magbubuhis nga naglisud sa ilang obligasyon gumikan sa penalties ug surcharges.

Tingoha sa pag-amendar niini nga malugwayan hangtud sa Septiyembre 30, 2022 ang amnestiya sa pagbayad sa buhis.

“City Ordinance No. 2572 was approved precisely because of the intended laudable purpose for the benefit of the taxpayers during this period of pandemic,” tipik sa unod sa committee report.

Dugang pa sa maong komitiba nga bisan pa man nga ang Dakbayan sa Sugbo ug ang ubang bahin sa nasud hinayhinay na nga nakabawi sa mga epekto sa pandemya, ang mga magbubuhis nag-agi gihapon og kalisdanan busa makiangayon lang maaprobahan ang extension sa amnestiya.

Ang Seksyon 4 sa CO 2572 nag-ingon nga ang mga magbubuhis nga sakop sa tax amnesty mao ang tanan nga adunay wala mabayri nga lokal nga buhis.

Lakip na niini ang real property taxes, business taxes, community taxes, ug uban pang mga bayronon.

Ang maong amnestiya magamit lamang niadtong mga magbubuhis kansang mga real property subject sa real property taxes nga wala pa masubasta sa kagamhanan sa dakbayan sukad sa pagka-epektibo sa ordinansa. MEL (BANATNEWS)