Mga contact tracer gipaubos sa training batok sa dengue

CEBU, Philippines — Gipahibawo ni Cebu City Councilor Joel Garganera, pangulo sa Emergency Operations Center Cebu City nga sobra na sa duha ka buwan nga namentinar sa siyudad ang ubos sa usa ka porsyento nga positivity rate sa COVID-19 cases.

Base sa datos sa EOC Cebu City ang active cases sa siyudad anaa nalang sa 22 ug sa 80 ka barangay sa siyudad 69 niini ang walay reported transmission sa COVID-19.

Ug gumikan sa padayong pagkunhod sa kaso sa COVID-19 sa siyudad ang mga personnel sa EOC sama sa contact tracers gipaubos og training kabahin sa search and destroy sa breeding site sa mga lamok gumikan kay nisaka ang kaso sa dengue sa siyudad.

Hatagan nila og prayoridad ang mga tunghaan ubos sa pakig-alayon sa Local School Board ug Department of Education Cebu City Division aron luwas sa dengue ang mga tunghaan kon magsugod na ang face to face classes.

Si Garganera nagpahinumdom gihapon kini nga dili gihapon magkompiyansa bisan og niubos na ang kaso sa COVID-19 sa siyudad gumikan kay wala pa mahuman ang COVID-19 pandemic.  Sa laing bahin, gihingusgan karon sa kagamhanan sa Siyudad sa Mandaue ang pagpakgang sa pagkuyanap sa sakit nga dengue.

Subay niini, ang siyudad nagpahigayon og pagpanglimpiyo sa mga nagkadaiyang lugar nga nagkakip sa mga kanal nga adunay napundong tubig nga mahimong kapuy-an sa mga lamok nga nagdala og dengue.

Si Percy Mendoza Pongasi, coordinator sa City Health Office sa siyudad nagkanayon nga kauban sa opisyales sa barangay nagpahigayon sila og misting ug pagpanglimpiyo sa mga kanal ug nagkuha usab sila og sample sa tubig nga napundo sa mga kanal pagpiho kong aduna ba’y mga lamok nga nagpuyo nga nagdala og dengue.

Base sa datos sa Regional Epidemiology and Surveillance Unit (RESU) nahimutang sa ikatulo ang siyudad nga adunay labing daghang kaso sa dengue. Romeo T. Limpangog/BDB (BANATNEWS)