Positivity rate sa COVID-19 pabiling ubos

CEBU, Philippines — Kapin na sa duha ka buwan nga naa sa ubos sa 1% ang positivity rate sa kaso sa COVID-19 dinhi sa siyudad sa Sugbo, ug nasulod kini sa 5% threshold o sukdanan sa World Health Organization WHO.

Sa datos kagahapon nga gipakita sa head sa Cebu City Emergency Operations Center nga si Joel Garganera, nakatala na pud og 0.59% positivity rate sa upat ka nagpositibo sa COVID-19 gikan sa 675 nga gi-test.

Nagpakita nga nagpabilin nga luwas ang siyudad bisan pa man sa mga nahitabong mass gatherings sama sa political rallies ug concerts sa wala pa naabot ang Mayo 9 nga piniliay.

Sa niaging 14 ka adlaw, ang labing dako nga natala nga kaso nahitabo niadtong Mayo 19 nga dunay unom ka kaso.

Ang upat ka bag-ong kaso napuno niadtong Mayo 21, busa moabot na ngadto sa 24 ka kaso ang natala sa 14 ka mga barangay.

“Again, let us not be complacent, kaya nato ni busa amping ug ampo kanunay,” suma pa ni Garganera.

Kasagaran sa active cases nipaubos sa home isolation ug walay natala nga namatay sa COVID-19 karong buwana.

Nasayran nga nagpabilin nga alert level 1 ang istado sa siyudad apan bisan pa man sa pag-ubos sa kaso, padayon ang lapad nga vaccination drive sa siyudad.

Subling gibanhaw ang pagpamakuna sa nagkadaiyang barangay ug regular gihapon ang pagpamakuna nga gipahigayon sa pipila ka mga mall dinhi sa siyudad. Sanden J. Anadia/MEL (BANATNEWS)