Mayor-elect Suan bukas kun dunay special elections

CEBU, Philippines — Bukas si Cordova mayor- elect Cesar Didoy Suan kun duna may himuong special elections nga himuon sa ilang lungsod kung kini maoy mando sa Comelec, bisan ug tan-aw niya nga hapsay ug malinawon ang nakalabay nga eleksyon niadtong Mayo 9,2022.

Kini maoy iyang tubag human sa nahitabo nga protesta sa naparot nga Mayor Techie Sitoy-Chu ug mga supporters niini. Sumala pa ni Suan, bisan kinsa adunay katungod nga mopadayag sa ilang kasakitan ug kasagmuyo sa kapildihan, pero wala siyay nakita nga kagubot niadtong nilabay nga eleksyon.

Matud niya malinawon kini ug hapsay ug nitingog na usab ang mga Cordovahanon nga nangita og kausaban ug tingusbawan sa dugay nang panahon.

Dugang pa ni Suan, kung maoy mando sa Comelec andam siya mosunod niini apan kampante siya sa iyang kaugalingon nga wala siya mamalit og botos.

Si Suan, nitug-an kung aduna may mga reklamong ipadangat batok kaniya iyaha kining tubagon sa proper nga forum.

Giawhag ni Suan, ang naparot nga mayor nga magtinabangay nalang sila alang sa kalamboan pa sa Cordova kay usa ra man ilang tumong ug tuyo ang kaayohan para sa tanan nga katawhan.

Gidasig usab ni Suan, ang mga supporters sa mayor nga hatagan usa sila og higayon nga ipakita usab ilang mga nahimo aron mahimo na silang magkauban sa umaabot nga mga adlaw.

Si Suan, nitug-an nga andam na siya sa pagdumala sa lungsod uban sa iyang konseho uban sa partisipasyon sa katawhan ug alang usab sa ilang mga plano ug proyekto. —/IBM (BANAT NEWS)