Msgr. Villanueva pasidunggan og ORH

CEBU, Philippines — Ang kagamhanan sa Siyudad sa Sugbo motunol og Order of Rajah Humabon Award ngadto kang Monsignor Rodolfo “Rudy” E. Villanueva tungod sa dakong kontribusyon niini sa siyudad.

Giaprobahan sa konseho ang resolusyon alang sa maong katuyoan nga gibase sa rekomendasyon sa Cultural and Historical Affairs Commission (CHAC).

Si Konsehal Joel Garganera ang nag-sponsor sa maong butang. Ang  Order of Rajah Humabon maoy kinatas-ang matang sa  award nga mahatag sa siyudad ngadto sa nagkadaiyang indibidwal nga nakatampo og dako nga dungog ug lapad nga kontribusyon sa bisan unsa nga aspeto alang sa kaayohan sa dakbayan ug sa mga molupyo niini.

“The ability, integrity and devotion of Msgr. Rodolfo E. Villanueva enabled him to render substantial and valuable contributions to the City of Cebu,” matud pa ni Garganera.

Natawo si Villanueva niadtong Septiyembre 16, 1940 ug naordinahan niadtong Hunyo 5, 1963. Nailhan siya isip banggiitan nga literary writer, composer ug icon sa natad sa liturhiyang musika .

Siya ang nagtagik sa mga kanta sa simbahan nga sama sa “Cancionero Cebuano”, “Twenty-Four Masses”, “Salterio Cebuano” ug  “Festive Series.”

Si Villanueva pud ang nagsulat sa pseudonym nga “Renato Madrid.”

Mananaog usab siya kaniadto sa Don Carlos Palanca Awards for Literature gumikan sa iyang collection, nga “Southern Harvest,” ug 2003 Umpil Gawad Alagad ni Balagtas.

Siya usab ang naa sa likod sa  nobelang “Devil Wings” ug “Mass for the Death of an Enemy” nga gipublikar niadtong 1997 ug 2000  sa Ateneo de Manila University Press.

Nahimo pud siya nga professor sa Music ug English sa San Carlos Seminary College ug karaang miyembro sa faculty sa Dipolog ug Dumaguete Seminaries.

Nakatudlo usab siya kaniadto sa Silliman University School of Music.

Ang pangulo sa CHAO nga si  Bryner Diaz nitataw nga nagsugod na sa sila sa pagsabot  alang sa petsa sa  awarding ceremony ngadto  kang Villanueva.

Pipila pa ka mga personalidad  ang nakadawat og Order of Rajah Humabon Award sama nilang anhing Cebu City Mayor Edgardo Labella, Environment Sec. Roy Cimatu, National Artist for Literature Dr. Resil Mojares, anhing  Archbishop Emeritus Ricardo Cardinal Vidal, kanhi Presidente Gloria Macapagal-Arroyo, ug uban pa. —/IBM (BANAT NEWS)