P8.12 milyong shabu nasakmit atol sa buy-bust operations sa kapolisan

CEBU, Philippines — Nikabat ngadto sa P8.12 milyones ang balor sa ilegal nga drugas ang nasakmit sa kapolisan gikan sa pito ka tawo nga nasikop sa sunod-sunod nga buy-bust operations niadtong Martes hangtud kagahapon sa kadlawon.

Atol sa gipahigayong operasyon sa kapolisan sa Mambaling Police Station niadtong Martes sa gabii nasikop si Byan Duallo Justol, 20-anyos, usa ka high value invidual.

Si Police Lieutenant Colonel Alan Rosario, hepe sa Police Community Relations sa Cebu City Police Office (CCPO) nagkanayon nga nagpadayon ang imbestigasyon ug profiling aron masuta ang tinubdan ug background ni Justol kinsa lumad nga taga Probinsiya sa Bohol.

Nasakmit gikan sa suspetsado ang 700 gramos nga shabu nga gibana-banang nibalor ngadto sa P4.7 milyones.

Sa samang adlaw, nasikop sa Regional Police Drug Enforcement-7 uban sa koordinasyon sa Tagbilaran City Police Station sa Bohol ang duha ka drug suspects sa Purok 5, Barangay Tip-Tip, Tagbilaran City.

Ang mga suspetsdo mao sila si Jezrel Aaron Estique Butalid, 38 ug Mary Mae Pocot Pondoc, 26.

Nasakmit gikan sa mga suspetsado ang 75 gramos nga shabu nga gibana-banang nibalor ngadto sa P510,000. Paglabay sa usa ka oras  diha sa Sitio Capaculan, Barangay Tisa, Dakbayan sa Sugbo nasikop usab sa RPDE-7 si Rocelito Parba Alcuizar, 38 kinsa nasakmitan og 50 gramos nga shabu nga nibalor ngadto sa P340,000.

Sa laing operasyon niadtong Miyerkules sa kadlawon nasikop diha sa Barangay Poblacion, Dakbayan sa Toledo si Christine Amodia Monte De Ramos, 26, taga Barangay Anihao sa maong siyudad.  Si Monte De Ramos giingong nalakip kini sa drug watchlist nga naglihok sa maong dapit.

Nasakmit gikan sa suspetsado ang 160 gramos nga shabu nga nibalor ngadto sa P1,088,000.

Sa samang adlaw usab nasikop sa mga sakop sa Provincial Drug Enforcement Unit, 1st Provincial Maneuver Force Company ug Balamban Police Station diha sa Barangay Arpili, Lungsod sa Balamban si John Marlon Alines Lausa, 33, taga Barangay Bunga, Dakbayan sa Toledo.

Nasakmit gikan sa suspetsado ang 110 gramos nga shabu nga nikantidad ngadto sa P748,000 nga gisulod sa itom nga sling bag.

Kagahapon sa hapon nasikop si Davi Bendijo Aguilar, 47 diha sa Barangay Looc, Dakbayan sa Dumaguete.

Nakuha gikan kang Aguilar ang 100 gramos nga shabu nga nibalor tanan ngadto sa P680,000.

Sa laing bahin, nasikop sa kapolisan sa Carbon Police Station sila si Josemari Gines,19 ug Ruel Belandres, 42, diha sa Barangay Ermita.  Nangulo sa maong operasyon si Police Major Kenneth Paul Albotra, hepe sa Carbon Police Station.

Nasakmit gikan sa mga suspetsado ang 28 gramos nga shabu nga nibalor ngadto sa P191mil ug buy bust money.

Samtang sa Dakbayan sa Talisay nasikop sila si Marianito Notarte Ventura II alyas “Amay”, 35, usa ka e-bike driver residente diha sa Barangay Cansojong.

Nasakmit gikan sa suspetsado ang 5.3 gramos nga shabu nga nikantidad ngadto sa P36,040.

Laing nasikop mao si Jamesful Viñan alyas “Impul”, 26, taga Barangay Tanke ug nasakmit gikan kaniya ang 10 gramos nga shabu nga nibalor ngadto sa P68,000. Nangulo sa maong operasyon si Police Lieutenant Elwood Ebona sa Talisay City Police Station.  —Rowena D. Capistrano, Gabriel C. Bonjoc/BDB (BANATNEWS)