Mga campaign poster wala pa gipangtangtang
CEBU, Philippines — Hangtud karon aduna pay mga nikandidato sa nilabay’ng eleksiyon nga wala magpabakana sa pagtang-tang sa ilang campaign posters.
Kini maoy gibutyag ni Lagrimas Abarquez, pangulo sa Solid Waste Management sa Dakbayan sa Talisay.
Sayo pa, ang Commission on Election sa Dakbayan sa Talisay nipadala og suwat ngadto sa mga nikandidato nga napilde ug nakadaog diin gipahinumdoman sila nga maoy molimpyo sa ilang mga propaganda nga gipangtaod.
Ang grupo ni Abarquez nagsugod na sa paglimpiyo sa niaging semana apan iyang namatikdan nga daghan pa gihapon ang limpiyohanan.
Matud ni Atty. Anna Fluer Gujilde, election officer sa siyudad nga mohimo unta sa ilang bahin ang mga nikandidato diin usa kini sa paagi nga ilang ipakita nga sila tarong nga mangalagad.
Nipahinumdom usab si Gujilde sa tanang nikandidato nga mosumiter sa ilang Statement of Contributions and Expenditures (SOCE).
Ang pagsumiter sa SOCE hangtud lang kini sa Hunyo 8, 2022. Nunot niini, gipanglangkat sa mga kabataan sa Lungsod sa Minglanilla ang mga campaign poster diha sa palibot sa ilang lugar isip tabang nila sa pagpanglimpiyo.
Ang mga batan-on nga sakop sa Kabataan Kontra Droga at Terrorismo sa barangay Manduang, Minglanilla maoy nihimo sa maong kalihokan.
Ilang gipakita ang ilang pagtabang pinaagi sa pagkuha sa campaign posters nga anaa sa mga punoan sa kahoy.
Nasayran nga adunay pipila ka mga pribadong establisamento ang nihangyo kanila nga langkaton usab ang nagbitay nga mga tarpaulin ug posters sa mga kandidato diha sa ilang edipisyo. —BDB (BANATNEWS)
- Latest