8 ka timbangan nasakmit sa merkado sa Tabunok
CEBU, Philippines — Nasakmit sa mga otoridad ang walo ka timbangan nga adunay deperensya diha sa merkado sa Tabunok, Dakbayan sa Talisay.
Si Eugene Torres, market inspector nagkanayon nga gihimo nila ang kinalit nga operasyon human sa daghang reklamo nga ilang nadawat.
Ang mga timbangan nga ilang nakumpiska naggikan diha sa fish section sa merkado.
Kahinumduman niadtong miaging buwan si Engr. Arnie dela Torre, consultant sa merkado sa Tabunok nibahad nga dakpon ang mga manindahay nga tikasan. Gidugang pa niya nga abli ang iyang buhatan alang sa mga reklamante aron mapitol ang mga mamintaha.
Nanawagan si Torres nga unta mopadayag sa ilang mga reklamo ang katawhan aron mahimoan dayon nila og aksyon.
Samtang gipahinumdoman usab ni Torres ang mamaligyaay nga mosusi sa ilang mga timbangan o ipa recalibrate kini diha sa ilang buhatan aron masiguro nga way mahitabong pagpanikas. —MEL (BANATNEWS)
- Latest
