Cebu City nibalik na og hatag sa ayuda

CEBU, Philippines — Gituman sa kagamhanan sa Dakbayan sa Sugbo ang ilahang saad nga ihatag kagahapon ang mga ayuda nga temporayong nahunong ang pagpang-apod-apod tungod sa election ban.

Nasayran nga kapin sa 45,000 ka beneficiaries sa financial assistance alang sa biktima sa bagyong Odette, Tabang Alang sa Panginabuhian sa atong Trabahante (TAPAT) Program ug Economic Stimulus Program ang nakadawat sa ilahang cash assistance kagahapon.

Usa sa mga nakadawat sa financial assistance si Jocelyn Selloga, 51-anyos residente sa Barangay San Roque kinsa naguba ang balay sa bagyong Odette ang dako og pasalamat sa ayuda nga nadawat.

Si Selloga kinsa nakadawat og P5,000 nga pinansiyal nga ayuda nagkanayon nga dako kining tabang kanila alang sa ilang inadlaw nga panginahanglanon.

Nasayran nga ang pagpanghatag sa financial assistance gihimo diha sa nagkalain-laing barangay sa Siyudad sa Sugbo.

Diha sa Barangay San Roque ang Office of the City Architect ang gitahasan nga mang-apod-apod sa financial assistance alang sa 886 ka indibidwal kinsa apektdo sa bagyong Odette.

Matud ni Architect Eleazer Lipang, pangulo sa Office of the City Architect nga matag balay ang makadawat og P5,000 nga ayuda.

Nagsugod sila sa ilahang distribution kagahapon sa alas 7:00 sa buntag. BDB (BANATNEWS)