Nangilkil pagtaud sa kuryente sikop

CEBU, Philippines — Duha ka linemen ug usa ka kanhi accredited electrician ang nasikop sa mga sakop sa National Bureau of Investigation (NBI) sa Central Visayas atol sa entrapment operation tungod sa giingong pagpangilkil para sa paspas nga pag-balik sa suplay sa kuryente.

Ang Visayan Electric nagpadala na og suwat sa NBI-7 aron paghimo og imbestigasyon bahin sa mga report nga dunay mga linemen nga nangilkil sa mga konsumidor aron mas unahon o dalion ang pagtaud sa ilang linya nga nangaputol tungod sa bagyong Odette.

"Ang request for us to investigate on the alleged complaint of criminal activities of their linemen extorting money from their consumers in exchange for priority electrical repairs,” sigun ni NBI-7 Regional Director Attorney Renan Oliva.

Giila sa mga otoridad ang mga dinakpan nga sila si Doroteo Valmoria Auxtero Jr., Bryan Burlaos Sacmar, ug Maximo Mariot Jr.

Modus na ni

Nagpadayon pa ang imbestigasyon tungod kay nagtuo ang mga otoridad lakip na ang mga kadagkoan sa VECO nga modus operandi na kini sa mga linemen aron mopahimulos sa sitwasyon.

Gipahigayon sa mga otoridad ang operasyon niadtong Enero 25,2022 sa hapon sa Upper Mohon, Talisay City.

Ang nasangpit nga mga suspek nipaubos usab sa inquest proceedings kagahapon (Huwebes). Sa ilang imbestigasyon, sila si Auxtero ug Sacmar mga accredited linemen sa usa sa mga contractor sa Visayan Electric.

Samtang si Mariot kanhi accredited electrician sa VECO  ug nahimo-himo og  peke nga lain-laing ID aron makigkunsabohay sa duha ka mga suspek sa ilang modus operandi nga pagpangilkil.

Ang mga Local Government Units sa Sugbu, ang Visayan Electric, ug mga pang law enforcement agencies nagpahimangno sa tanan nga gidili kini sa balaod.

P15 mil

Ang pagpabayad sa mga linemen sa mga konsumidor aron unahon og taud aron mabalik ilang kuryente gidili sa balaod.

"So these individuals were caught red-handed asking VECO consumers a total amount of 15,000 pesos,10,000 of which were marked, nangayo pa jud sila’g additional 5,000 kay dako kuno kaayo og trabaho,” matud ni Oliva.

Matud ni Oliva nga gawas nilang tulo aduna pay laing tawo nga nalambigit niini.

Sa imbestigasyon nga gipangulohan sa agent on case nga si Wenceslao Gallendez ang maong mga akusado nagpakaaron-ingnong mga lehitimong kontraktor sa Visayan Electric ug job order ang paagi sa ilang trabaho aron mogawas nga legal nga sila magpabayad.

“So mahibung ka nganong kanhi accredited electrician sa VECO kuyog sa kasamtangang contractors sa VECO,” matud ni Oliva.

Atol sa ilang pagkasikop, nasakmit gikan kang Mariot ang nagka lain-laing billing statements sa mga konsumidor.

Duna pay lain

Si Engineer Raul Lucero, COO ug Presidente sa VE miingon nga human nila gisugdan ang restoration sa suplay sa kuryente daghan sila og nadungog nga mga report nga namasangil nga dunay mga linemen nga nagpabayad aron unahon og taud ang balay sa mga mobayad kanila.

“Posible nga naa gyuy namayad didto sa gawas kay naa naabot ing-ani nga estorya, so mao to nag conduct og investigation internally, amo sad gipatawag among mga contractors,” matud ni Lucero.

Nagtuo si Lucero nga dili lang kining tulo maoy nalambigit niini ug duna pay laing linemen nga nagbuhat sab niini.

Si Oliva miingon nagpadayon pa gihapon ilang imbestigasyon bahin ani ug gisusi nila kun kinsa pay laing mga linemen nga nalambigit sab niini nga modus operandi.

Ang tulo gipasakaan og kasong Republic Act 7832 o Anti-Electrcity and Electric Transmission Lines/Materials Pilferage Act in relation to Article 8 of the Revised Penal Code.

Gawas niini, gipasakaan usab sila og kasong kalapasan sa Article 318 sa Revised Penal Code (other deceits). —IBM (BANATNEWS)