DA, BFAR giawhag nga motabang sa mga mag-uuma ug mananagat

CEBU, Philippines — Niduso og resolusyon kagahapon si Cebu City Councilor Dave Tumulak atol sa ilahang regular session sa konseho nga nag-awhag sa Department of Agriculture ug Bureau of Fisheries and Aquatic Resources nga motabang sa mga mag-uuma ug mananagat nga naapektohan sa bagyong Odette pinaagi sa ilahang assistance programs o subsidies.

Nalakip usab sa resolution ni Tumulak nga nag-awhag sa Department of Trade and Industry ug Philippine National Police nga istriktohon sa pagpatuman ang Akta Republika 7581 kun “Price Act”.

Nag-awhag usab si Tumulak sa producers, farmers ug fisherfolks gikan sa ubang mga lugar nga wala maapektohi sa bagyo nga motabang ug mopadala sa ilahang mga produkto sa Cebu City sa normal nga presyo aron malikayan ang overpricing ug mamentinar ang igong supply sa pagkaon. Si Tumulak nagkanayon nga gihimo niya kini human niya nabantayi nga adunay pagkasa sa presyo sa mga nag-unang palaliton dihang nisuroy siya diha kamerkadohan sa siyudad.

Ang resolusyon ni Tumulaki gipadala niya sa nahisgutang mga ahensiya sa gobiyerno kagahapon ug makigkita usab siya sa opisyales niini aron tukion ang maong isyu. —BDB (BANATNEWS)