City health andam ra sa pagbakuna sa 5 ngadto sa 11 anyos

CEBU, Philippines — Andam ra ang Cebu City Government kun ugaling sugdan na nila ang pagpamakuna sa mga bata nga nag-edad og 5 anyos ngadto sa 11 anyos.

kini suma pa ni Dr. Jeffrey Ibones, Officer-in-Charge sa Cebu City Health Department.

Una niini, ang Department of Health nagtinguha nga magsugod sa vaccination sa mga bata sa maong mga edad sa unang semana sa buwan sa Pebrero.

Segun ni Dr. Ibones magpaabot sila sa guidelines labot niini aron ilahang matan-aw kun unsay mga gikinahanglan nga mga rekisitos sa pagpahigayon sa vaccination sa 5 anyos ngadto sa 11 anyos aron dili sila magbalik-balik sama sa nahitabo kaniadto dihang gisugdan na nila ang 12-17 years old nga vaccination.

“Actually pareha rana siya pediatric population, although tungod lang sa edad kay gamay-gamay ang edad mao nay importante kaayo nga kinahanglan gyud ta og pediatrician nga makatabang nato which is atong gihapon karon, sige lang naa man mi meeting every night ato ng i-open og unsaon na nato but ang amoang giplanuhan duol lang gihapon sa hospital which is wala paman na open ang atoang kaning Southwestern duol man na siya pwede man tingali if ever ma open sila diha nato ibutang or ang Abellana dako man kaayo depende lang og pila kabuok ang magpa register pud”, matod ni Dr. Ibones.

Gipasabot ni Dr. Ibones ang mga Doctors ilabi na katong mga pediatricians nasayod na sa ilahang buhaton pag-handle sa mga bata nga nag-edad og 5 anyos ngadto sa 11 anyos.

Dugang sab ni Ibones nga kinahanglan sab nga naa ang ginikanan sa mga bata aron mapasabot gyud nila labot sa maong pagpamakuna.

Susihon pa sab sa Cebu City Health Department kun pila ka mga bata nga nag-edad og 5 anyos ngadto sa 11 anyos ang bakunahan kontra COVID-19.

Hangyo ni Dr. Ibones sa mga ginikanan nga dili mahadlok tungod ang mga health workers, vaccinators ug doctors ni-agi og training ilabi na sa pagbakuna sa mga bata. —MEL (BANATNEWS)