Dizon: way pamolitika ang pagtambong sa protesta sa mga vendors
CEBU, Philippines — Giklaro ni Konsehal Alvin Dizon nga wala sagoli og kolor-politika ang iyang presenya ug sa ubang miyembro sa Bando Osmeña Pundok Kauswagan sa protesta sa miaging adlaw sa pipila ka manindahay sa Warwick Barracks ug Freedom diha sa Carbon Public Market.
Matud pa ni Dizon nga nakadawat siya og imbitasyon sa maong kalihokan aron paminawon ang sentimento sa mga vendors.
Isip konsehal, angayan lang pud nga maminaw kun unsay yangongo sa pipila ka mga sektor. "Mandato mana nato isip opisyal sa gobyerno. Kun dunay mga concern ang nagkadaiya nga mga sektor, atoa gyud na nga paminawon," matud pa ni Dizon.
Sa nasayran ang mga vendors sa Carbon Market nagprotesta tungod kay supak sila nga mobalhin sa interim market.
Moabot matod pa sa 700 ka mga manindahay sa Warwick Barracks ug Freedom Park ang gipaabot nga ibalhin sa temporaryo nga gitukod nga merkado.
Kahinumduman nga ang Kagamhanan sa Siyudad sa Sugbo nisulod og Joint Venture Agreement (JVA) tali sa Megawide Construction Corp. alang sa modernisasyon sa Carbon Market.
Dili gusto ang manindahay nga mobalhin sa interim market sa rason nga lisod ug bati ang pwesto, dili accessible matod pa sa mga tawo ug gumikan matod pa sa kagamay sa pwesto niini. Nihimo sila og protesta tungod kay dili sila buot nga maapektuhan ang ilang adlaw adlaw nga panginabuhi.— MEL (BANATNEWS)
- Latest