Tag P5 mil nga ayuda ipanghatag na sa Mandaue

CEBU, Philippines — Gikatakda na nga magsugod karong adlawa Miyerkules Enero 26, 2022 sa pagpanghatag sa kagamhanan sa Dakbayan sa Mandaue sa P5,000 nga financial assistance sa mga biktima sa super typhoon Odette.

Gikan ang maong pundong salapi sa nasudnong kagamhanan nga ipang-apod-apod sa lokal nga kagamhanan

Si Atty. John Eddu Ibanez, executive secretary ni Mayor Jonas Cortes miingon nga ang mga beneficiaries gikan sa lima ka mga barangay sa siyudad maoy unang makadawat sa maong pinansiyal nga ayuda

Naglakip maong barangay mao ang Tawason, Tipolo, Jagobiao, Canduman ug Bakilid.

Si Ibanez miingon nga ipangapud-apod ang pinansiyal nga ayuda pinaagi sa pag-house to house niini.

Kini pagalangkoban sa mga personnel sa City Social Welfare Office, City Treasurer Office, mga polis sa Mandaue City Police Office (MCPO) ug ingon man gikan sa mga barangay nga hingtungdan.

Ang mga barangay nga makadawat maoy nakakompleto na sa ilang listahan nga gi-post sa matag barangay hall. —IBM (BANATNEWS)