CCPO Mohatag og seguridad sa media kun dunay hulga

CEBU, Philippines — Ang Cebu City Police Office (CCPO) nipasalig sa paghatag og seguridad sa media kon adunay mga hulga batok kanila nga mapamatud-an atol sa 2022 national elections.

Si Police Lt. Colonel Maria Theresa, CCPO Information Officer niingon nga kini ang ilang initiative sa pag-replicate sa city level, ang direktiba sa Philippine National Police (PNP) Chief.

“Ang Cebu City Police Office permanente nga naghatag og suporta sa atong mga kauban sa media, base sa atong prior experiences,” matod ni Macatangay.

Gikataho nga ang PNP gimanduan na sa Department of Interior and Local Government nga magtudlo ug Media Security Focal Persons sa matag probinsiya ug siyudad sa nasud. Kini alang sa kaluwasan ug proteksyon sa mga sakop sa media nga mahimong mag-atubang og mga hulga o pagpanghulga sa dagan sa 2022 elections coverage.

Usa na ka memorandum ang gipagawas ni DILG Secretary Eduardo M. Año ngadto kang PNP Chief General Dionardo Carlos subay sa hangyo ni Presidential Task Force on Media Security (PTFoMS) Executive Director Joel Sy Egco.

“We are advancing our protocols on this one, based sa pronouncement sa atong chief PNP, so based on that gahimo og initiative nga i-replicate on the city level ang mao nga mando sa atong chief pnp,” matod ni Macatangay.

Sa dakbayan sa Sugbo, si Macatangay, kinsa maoy kasamtangang information officer sa CCPO, mobarog usab isip media security focal person sa Cebu City-based nga mga media personnel.

Bisan pa, siya midugang nga kung adunay mga taho sa mga hulga batok sa pipila ka mga kawani sa media, ilang i-validate kini sa dili pa maghimo og dugang mga aksyon.

“We have to assess if threats really are validated and they should be substantiated by other members of media as well kay para walay matawag nga special treatment,” matod ni Macatangay.

Sa pagsuwat ning balita, si Macatangay niingon nga wala pa sila makadawat og report sa hulga nga gilabay batok sa usa ka media personnel dinhi sa dakbayan sa Sugbo.

Subay niini, giawhag niya ang matag media personnel nga nag-atubang sa maong mga hulga, nga i-report kini sa kapolisan sa labing daling panahon.— MEL (BANATNEWS)