DepEd 7 misuspenso sa klase sa rehiyon hangtud sa Enero 31
CEBU, Philippines — Suspendido ang tanang klase sa rehiyon 7 sugod Enero 24 ngadto sa 31 gumikan sa padayong pagsaka sa kaso sa COVID-19.
Ang Department of Education, Region 7 nipagawas ug Regional Memorandum No. 052-2022 pinetsahan Enero 20, 2022 nga nagdeklarar sa suspension sa klase sa mga lugar ubos sa Alert Level 3.
Ang memorandum gipirmahan ni DepEd-7 Regional Director Dr. Salustiano Jimenez nagkanayon nga tungod sa padayon nga pagsaka sa kaso sa COVID-19 ug sa epekto sa bagyong Odette, maoy hinungdan nga gisuspenso ang klase.
Lakip na niini ang pag-uswag sa pagsumiter sa mga academic requirements ug pagpahigayon ug teaching-related activities.
Gihatagan hinuon ug katungod ang mga private school kung magsuspenso ba sila sa ilang klase o dili basta adunay konsultasyon sa mga ginikanan bahin niini.
kahinumduman ang Central Visayas gipaubos sa Inter-Agency Task Force for the Management of Emerging Infectious Disease ngadto sa Alert Level 3.
Gitug-an ni Jimenez, magdepende usab sa sitwasyon unya sa umaabot nga adlaw kung aduna bay extension ang break sa mga kabataan, ilabi na sa Central Visayas nga dili lang COVID-19 ang giatubang nga suliran kun dili apil na usab ang kadaut nga gibilin sa bagyong Odette. —MEL (BANATNEWS)
- Latest
