Cebu City nangayo og P15 bilyones sa national government

CEBU, Philippines — Gibutyag ni Cebu City Mayor Michael Rama nga nagkaestoryahanay sila ni Senador Christopher Lawrence “Bong” Go kalabot sa hinabang pinansiyal nga iyang gipangayo gikan sa nasudnong kagamhanan aron gamiton sa pagbangon sa Siyudad sa Sugbo human gikuso-kuso sa bagyong Odette niadtong Desyembre 16, 2021.

Matud ni Rama nga subli siyang nagpadala og suwat kabahin sa mao niyang tumong ug posibleng nakaabot na kini sa Office of the President ug possible usab nga makig-alayon alayon siya kang Executive Secretary Salvador Medialdea.

Nasayran nga P15 bilyones ang gipangayo nga hinabang ni Rama gikan sa national government.

Ang maong pundo gamiton sa problema sa kuryente, tubig, communication, pagkaon, housing, agriculture ug uban pang basic services nga maoy naapektohan human sa bagyo.

“Practically put it all together if you looking at the whole gamot dili na siya matubag in thousand, dili na siya matubag in ordinary billion but it is billions kay ngano man if you’re going to have Build, Back, Better, di man mahimo nga atong tan-awon atong 3-meter easement mao lang gihapon”, tipik sa pamahayag Rama.

Dugang ni Rama nga kong ugaling dili mahatag ang maong pundo sa administrasyon karon aduna pay laing administrasyon. BDB (BANATNEWS)