2 ka patay‘ng lawas nga nakit-an sa Aloguinsan nailhan na

CEBU, Philippines — Hingpit nang giila sa ilang tagsa-tagsa ka mga pamilya ang patay nga lawas sa duha ka lalaki nga napalgan diha sa Barangay Kawasan, bukiran nga bahin sa Lungsod sa Aloguinsan,  niadtong Huwebes sa buntag.

Ang mga biktima nga pulos dunay samad pinusilan nasuta nga taga dakbayan sa Sugbo ug naila nga sila si Harold Bejasa, 32anyos, taga Barangay Ermita ug Eric Amigabli, 34anyos, taga Sambag 1 apan lumad nga taga Barangay Inayawan.

Matud pa ni Police Staff Sergeant Marvin Hubahib, Desk Officer sa Aloguinsan Police Station ang patay nga lawas sa mga biktima giila sa ilang mga kabanay.

Si Bejasa, giila mismo sa iyang mga ginikanan, Huwebes sa hapon human sila nakadawat ug taho nga adunay patay nga lawas nga nakit-an sa Aloguinsan.  Sumala pa ni Hubahib, si Bejasa, giingong Miyerkules sa hapon nakit-an sa pamilya nga nilakaw sa ilang balay.  Samtang si Amigabli, giila sa iyang amahan, alas sayes pasado sa gabii human kini nidangop sa kapulisan sa dihang nakadungog ug taho nga dunay mga patay nga nakit-an sa Aloguinsan.

Si Amigabli, giingong nilakaw sa ilang balay Miyerkules sa hapon base sa pamahayag sa anak niini ug giingong nisakay ug motor.

 Ang kapulisan padayon pa nihimo ug imbestigasyon may kalabutan sa motibo sa pagpamusil patay sa mga biktima.  Suma pa ni Hubahib nga ang ilang hepe ug imbestigador nakig-alayon usab sa kapulisan sa Dakbayan sa Sugbo, aron sayran ang background sa mga gipatay ug kung aduna ba kini mga kaso nga giatubang.

Samtang ang kapulisan sa Aloguinsan, blangko pa sila karon sa motibo sa pagpatay sa mga biktima. MEL (BANATNEWS)