Mayor Cortes mibutyag nga positibo kini sa Covid-19

CEBU, Philippines — Gipahibalo ni Mayor Jonas Cortes pinaagi sa post sa Facebook sa Public Information office (PIO) nga nagpositibo kini sa coronavirus disease 2019.

Sa maong post kini miingon  nga subay usab kini sa migawas nga resulta sa swab test ngadto kaniya.

Tungod niini, nag home isolation kini dayon sa iyang kaugalingon. Wala sab kini mobutyag kun duna pay laing miyembro sa iyang panimalay ang napositibo sa maong sakit. Apan siya mipasalig nga bisan pa sa iyang kahimtang magpadayon ang iyang monitoring sa kabarangayan lakip na ang kampanya batok sa maong sakit ug ingon man ang pagpamakuna.

Sa laing bahin, gipahibalo sa Talisay City Health Office nga dunay usa ka Talisaynon nga napositibo sa Omicron variant. Ang maong Talisaynon usa ka Overseas Filipino Worker nga nipauli sa nasud.

Apan giklaro ni Dr. Lino Alanzado, pangu sa Talisay City Health Office nga wala kini makalahos og uli sa Talisay City tungod nga gipaubos dayon kini sa 14 ka adlaw nga quarantine sa usa sa mga pasilidad sa Cebu City. Gipagawas ra sab kini human nasuta nga negatibo na kini sa virus.

Nahibaw-an nga usa siya sa 22 ka kumpirmadong kaso sa Omicron variant nga gipagawas sa Department of Health -7 dili palang dugay.

Kahinumdoman nga dunay kapin 70 ka samples nga nakolekta sugod Disyembre 27,2021 hangtud Enero 6,2022 ang gipadala didto sa Philippine Genome Center alang sa genome sequencing pagtino kun unsa kini nga strain sa Covid-19 ang nakatapot kanila. Ang 22, Omicron variants.

Nagkanayon si Alanzado nga ila nang gihimo ang contact tracing sa mga kabanay ug nahibaw-an nga wala’y usa kanila ang nagpositibo sa virus.

Sa labing uwahi nga kaso sa Covid-19 sa siyudad, duna kini 84 ka bag-ong aktibong kaso hinungdan nga nahimo na kini karong 372.— Gabriel Bonjoc/IBM (BANATNEWS)