Dul-an 400 mil konsumidor sa VE nabalik na ang kuryente

CEBU, Philippines — Moabot na ngadto sa 394,400 sa 474,182 ka mga apektadong kustomer sa franchise area sa  Visayan Electric niadtong pag-igo sa bagyong Odette ang nabalikan na sa ilang kuryente.

“Energized areas are from the cities of Cebu, Mandaue, Talisay, and Naga and from the municipalities of San Fernando, Minglanilla, Consolacion and Liloan,” matud pa sa Visayan Electric.

Nihatag usab kini sa ilang datos ilabi na sa porsyento nga na-energinize sa matag lugar ug kini naglangkob sa Cebu City (79%) , Talisay City (90%), Minglanilla (76%) , Naga (83%) , San Fernando (78%), Mandaue City (94%) , Consolacion (78%), ug Liloan (92%).

Una na nga gibutyag sa tigpamaba sa Visayan Electric nga si Queenie Sanchez-Bronce nga ang  pag-ayo sa koneksyon sa kuryente sa usa kay lugar nag-agad usab sa istado sa damages niini.

Matud pa niini, dili nila basta lang pasigahon ang linya kung dili masusi ang koneksyon gikan sa poste hangtud sa mga balay tungod kay peligro kining makamugna og sunog ug makaingon na sab sa mga brownouts.  Sa pikas bahin si Minglanilla Mayor Elanito Peña miingon nga ubay-ubay pa sa ilang dapit ang wala pa mabaliki og kuryenti kay aduna paman uban nga poste nga nangatumba. Apan ila kining gihinay-hinay ug pabarog inabagan sa taga barangay.

Matud pa ni Peña nga padayon ang ilang clearing operation sa mga sudlonon nga lugar ug ilang gipangtagaan ang 19 ka barangay og chainsaws aron makalihok pud sila sa pagputol sa kahoy nga nangatumba.

Sa Gobernador Gwendolyn Garcia nibisita sa Minglanilla ug nanghatag og mga sin ug plywood sa tres mil kapin ug kulang nga panimay nga nangaguba atol sa bagyong Odette.

Nipasalig sab ang gobernador nga mohatag og generator sets sa mga lugar nga madugay-dugay pa mabalikan og kuryente tungod sa dakong kadaut sa ilang mga linya sa kuryente.— Gabriel Bonjoc/IBM (BANATNEWS)