Vaccination card required na sugod kagahapon sa Cebu City

CEBU, Philippines — Gi-required na sa Dakbayan sa Sugbo ang mga indibidwal nga mopakita og vaccination card kong mosulod diha sa mga enclosed nga pampublikong lugar sama sa mga mall ug uban pa nga mga establisamento.

Tipik kini sa Executive Order 157 nga gipirmahan ni Mayor Michael Rama kagahapon.   Nag-highlight usab kini sa Mandatory Stay At Home Order ug ang maong EO nag-ulohan og "Oplan Puyo Gihapon".

Dili na makasulod sa mga mall ang nag-edad og 11-anyos paubos samtang ang   bakunado nga 12 hangtud sa 17-anyos gitugotan lang nga makasulod sa mga establisamento kong kuyogan kini og guardian nga bakunado usab.

Ang mga manulod sa mga establisamento nga sama sa mall gikinahanglang mo presentar sa vaccination card ug identification document sa pagsulod sa maong mga lugar.

Ang nahisgutang EO epektibo kini sugod kagahapon hangtud sa Enero 31, 2022.

Nunot niini, subling giklaro ni Rama nga ang Siyudad sa Sugbo dili mosunod sa ‘no vax card, no ride’ policy, nga gipatuman sa mga pampublikong sakyanan didto sa kaulohan.

Apan kon momando na ang Department of Transportation dinhi sa Siyudad sa Sugbo respeto niya ang maong kamandoan.

Samtang si Gobernador Gwendolyn Garcia supak usab niini ug gihulagway niya kini nga “anti-poor”

Gitumbok ni Garcia ang Akta Republika 115251 kun “COVID-19 Vaccination Program Act of 2021” nga nagkanayon nga “Provided further, that the vaccine cards shall not be considered as an additional mandatory requirement for educational, employment and other similar government transaction purposes”

Matud ni Garcia nga walay border control sa probinsiya apan adunay border  checkpoints pasabot mosusi lang ang kapolisan kon ang mga pasahero ug drayber nagsul-ob og face mask ug kon naka-al fresco ang PUVs apan dili himuong requirement ang vaccination card aron makasakay sa mga sakyanan.

Dili ipatuman ni Garcia ang “no vaccination, no ride” policy sa Probinsiya sa Sugbo.

Si Garcia niluwat kagahapon og memorandum ngadto sa mga mayor sa Probinsiya sa Sugbo nga dili ipatuman ang “no vaccine, no work policy”.

Ug dili na usab kinahanglang mopakita og vaccination card ang indibidwal kon kini adunay transaction.

Samtang sa Dakbayan sa Talisay pulos na bakunado batok COVID-19 ang mga kapitan sa siyudad.

Gikompirmar kini ni Kapitan Josefina Concial, presidente sa Association of Barangay Counicl (ABC) sa Dakbayan sa Talisay. —Le Phyllis F. Antojado, Gabriel C. Bonjoc/BDB (BANATNEWS)