Mga bar operator gipasidan-an ni Rama
CEBU, Philippines — Si Mayor Michael Rama nanawagan sa operators og mga bar nga dili sukdon ang pasensiya sa kagamhanan sa Siyudad sa Sugbo gumikan kay gukdon gyud nila kini kon mosupak sa gilatid nga protocols.
Mao kini ang mensahe ni Rama human siya nakadawat og report nga giingong adunay bar ang nag-operate gihapon bisan lapas na sa oras sa curfew.
Gipahimagnoan ni Rama ang bar operators nga tumanon gyud ang husto aron dili masirado ang ilang mga establisamento.
Hinuon gitataw ni Rama nga mag-agi kini og hustonmg proseso diin ang Business Permits and Licensing Office na ang mosusi niini.
Sayo pa, adunay nigawas nga report nga giingong adunay usa ka bar nga kaduha na nasakpan nga wala motuman sa saktong protocols.
Hugot nga gipatuman karon ang curfew sa siyudad nga magsugod sa alas 11:00 sa gabii hangtud sa alas 4:00 sa buntag.
Gikataho nga niabot ngadto sa 248 ka violators ang natala atol sa hiniusa nga Oplan Bulabog nga gipahigayon sa Dakbayan sa Sugbo.
Kasagaran kanila naglaag gihapon bisan lawom na ang kagabhion. —BDB (BANATNEWS)
- Latest