Hubog namatay human nasukmagi sa silingan

CEBU, Philippines — Usa ka lalaki kinsa niuwang sa away sa magtiayon niyang silingan ang nakapatay niadtong Domingo diha sa Barangay Mabunao, Lungsod sa Tabuelan.

Apan ang maong insidente nataho ngadto sa kapolisan niadtong adlaw’ng Martes na.

Ang napatay mao si Federico Paller, 33-anyos, residente sa maong dapit.

Base sa imbestigasyon sa kapolisan nga giingong nag-away si Paller ug asawa niini nga si Merlinda tungod kay nasuko ang biktima nga gipaundang og videoke aron unta magpatoktok sa ilang mga manok.

Ang biktima kinsa hubog niadtong higayona nagyawyaw kini nga maoy hinungdan sa ilang lalis ug sa asawa niini.

Ang suspetsado nga si Jomar Ruelo, 27, silingan sa managtiayon nisuway sa pagbadlong sa magtiayon nga naglalis apan giingong giwakli kini ni Federico ug dayon lakaw.

Ang suspetsado giingong nasuko ug giingong namahad nga patyon ang asawa sa biktima.

Sa pag-uli ni Federico sa ilahang balay giingong gihagit kini og sukmagay ni Ruelo apan wala panumbalinga sa biktima ang suspetsado.

Giingong ang suspetsado wala mohunong sa pagpanghagit hinungdna nga nigawas sa ilang balay si Federico ug nahitabo ang sinukmagay.

Si Federico naigo sa baba sa kinumo sa suspetsado hinungdan nga natumba kini ug nabunal diha sa semento.

Si Federico daling gidala ngadto sa tambalanan ug ang amahan niini nga si Federico Paller Sr. ang ni-report sa kapolisan sa hitabo ug namatay gyud ang iyang anak.

Si Ruelo nasikop usab dayon kini sa mga polis. —BDB (BANATNEWS)