Visayas Media Hub tukoron karong tuiga
CEBU, Philippines — Gikatakdang sugdan karong tuiga ang katukoran sa labing una nga Visayas Media Hub.
Mapasalamaton si Presidential Communications Secretary Martin Andanar ngadto sa Kongreso ug kang Senador Christopher Lawrence “Bong” Go nga maoy pipila sa instrumento nga mahatagan og katumanan ang maong katuyoan. Nasayran nga nalakip kini sa 2022 national budget ubos sa flagship nga “Build, Build, Build” program sa nasudnong kagamhanan.
Ang gobiyerno nigahin og P300 milyones alang sa pagpatukod sa Visayas Media Hub diha sa Barangay Subangdaku, Dakbayan sa Mandaue nga gikan sa General Appropriations Act for Fiscal Year 2022.
Giingong usa kini sa kabilin sa administrasyong Duterte alang sa epektibong mga operasyon sa komunikasyon.
Matud ni Andanar nga magsilbi kini nga usa sa mga locator sa People’s Television, Inc. (PTV).
Giingong ipahimutang usab dinhi ang ubang Presidential Communications Operations Office attached agencies sama sa Philippine Broadcasting Service (PBS), Philippine Information Agency (PIA), Philippine News Agency (PNA), ug Radio Television Malacañang (RTVM).
Gawas sa P300 milyones nga budget alang sa katukoran sa hub laing P300 milyones ang igahin alang sa state-of-the-art nga broadcast equipment ug pasilidad lakip na ang 4-storey building nga adunay roof deck, broadcast complex, duha ka TV studios ug opstional nga radio booths, automated master control system, transmitter ug satellite uplink system, TV broadcast IT system, news graphics system, digital transmitters, ug uban pa. BDB (BANATNEWS)
- Latest