Evacuation center ug quarantine facility tukoron sa Toledo

CEBU, Philippines — Usa ka evacuation center ug quarantine facility ang tukoron unya sa syudad sa Toledo.

Ang maong pasilidad nga mobalor og P33 milyones adto itukod sa Sitio Tunnel, Barangay Poblacion.

“Agi og pagtubag sa hagit sa kasamtangang pandemya ug nagsingabot nga katalagman, gisubhan karon sa kagamhanan ang umaabot nga katukuran sa bag-o ug modernong evacuation center ug quarantine facility nga anaa mahimutang sa Sitio Tunnel, Barangay Poblacion niining dakbayan” matud sa Toledo City Public Information Office.

Ang pondo nga gigahin sa pagpatukod sa maong edipisyo gikan sa Department of Public Works and Highways (DPWH).

Sila si Mayor Joie Piczon-Perales uban sa tibuok konseho pinangulohan ni Bise-Mayor Jay B. Sigue ug ubang department heads sa Toledo City Government maoy nangulo ug nisaksi sa maong kalihokan niadtong Enero 17, 2022. Le Phyllis F. Antojado/MEL

Yokohama City nagpada og hinabang alang sa siyudad sa Sugbo

Nagpadala og hinabang ang Yokohama City sa nasud sa Japan alang sa mga nabiktima sa kalamidad dinhi sa Siyudad sa Sugbo.

Niduaw kang Mayor Michael Rama si Toshihide Kawasaki, Consul General sa nasud sa Japan dinhi sa Cebu ug personal kini nga nidunol sa ilang hinabang alang sa mga apektado sa katalagman.

Sa taho sa Cebu City Public Information Office, ang maong hinabang nga gikan sa Yokohama City gipaagi sa Guun Co., Ltd. Ug Cebu Leads Foundation, Inc ug kini naglangkob sa kinahon nga mga face masks, sleeping bags, ug emergency food packs.

Suma pa ni Rama nga pipila sa iyang prayoridad sa maong hinabang mao kadtong mga nabiktima sa sunog.

Sa laing bahin mohatag og assistance ang siyudad sa Danao sa lungsod sa Alegria nga usa sa labing apektado sa pag-igo sa bagyong Odette.

Usa ka buwan human sa pag-igo sa bagyong Odette nahibalik na ang supply sa koryente sa tanang barangay sa siyudad sa Danao ug 100 percent na usab nga nabalik ang supply sa tubig.

Segun sa facebook post sa Danao City Government gimando ni Mayor Nito Durano sa City Disaster Risk Reduction and Management Office (CDRRMO) nga mopada na og tabang sa ubang Local Government Units (LGUs) sa Sugbo nga grabi sab nga naapektuhan sa bagyo.

Nakig alayon na sila sa Alegria alang sa pag-abag niini ilabi na sa clearing operations nga mag sugod karong adlawa Enero 19 hangtod Enero 21, 2022. Le Phyllis F. Antojado/MEL (BANATNEWS)