Omicron nakapanakod na dinhi

CEBU, Philippines — Hilom nga niabot ug nanakod dinhi sa Rehiyon-7 ang Omicron variant sukad pa niadtong naghinapos nga bahin sa Disyembre.

Gibutyag kini ni Dr. Mary Jean Loreche ang chief pathologist sa Department of Health (DOH) Central Visayas human nila nadawat ang resulta sa mga samples nga gipadala ngadto sa Philippine Genome Center (PGC) diin nagpakita nga adunay  22 ka positive case sa Omicron variant dinhi.

Kini nagagikan sa 78 ka mga samples nga ilang gipadala sa PGC alang sa genomic sequencing.

“Labing anim (16) nito sa mga samples na ito ay from our Overseas Filipino Workers (OFWs), isang returning overseas Filipino, and lima (5) from the local community. A total of 22,” matud ni Loreche atol sa iyang Visayas Vaccination Operations Center (VVOC) briefer kagahapong adlawa Enero 18, 2022.

Nakolekta ang maong mga samples gikan sa mga napositibo sa Covid-19 sugod niadtong Disyembre 27, 2021 hangtod Enero 6, 2022.

Apan si Loreche miingon nga kining 22 nangaayo na ug nakauli na sa ilaha ug nakapahigayon na sila og contact tracing sa mga kataposan nilang nakauban.

Ang Omicron variant, usa ka variant sa Covid-19 nga paspas motakod apan dili sama sa delta variant nga grabe og sintomas ug daghang nangamatay. Gikataho sab nga ang mga nataptan og omicron mild ra ang sintomas hilabina sa bakunado. Ang mga sintomas naglakip sa karat ang tutunlan ug sip-unon.

Ang pagsaka sa kaso sa Covid-19 karon giingong tungod kini sa Omicron variant. Base sa DOH case bulletin niadtong Enero 17, 2022, ang active cases sa Rehiyon 7 anaa sa 6, 686 human nadugangan kini og 1, 101 ka mga kaso.

Pag-abot sa capacity utilization rate (CCUR) sa mga pampubliko nga hospital anaa sa 71.7%. 325 ang na admit nga mga pasyente sa tambalanan. Ang 173 mga regular nga pasyente nga asymptomatic ug adunay mild nga sintomas, 147 ang moderate ug severe samtang lima ang kritikal.

Gikan sa 453 nga allocated Covid beds, 128 ang bakante pa. Samtang sa CCUR sa mga pribadong tambalanan  ang CCUR nisaka ngadto na sa 35.9% gikan sa 644 ka mga Covid beds nga gitagana.

Matod ni Loreche, 231 ang na-admit sa mga pribadong hospital, 137 niini ang asymptomatic ug mild ang sintomas, 86 ang moderate ug severe samtang walo ang kritikal.

Ang bakante karon nga mga Covid beds sa mga pribadong hospital anaa sa 413. —IBM (BANATNEWS)