Mga kapitan nga walay bakuna gipangita
CEBU, Philippines — Gipasusi karon ni Cebu City Mayor Michael Rama kun kinsa sa mga kapitan ang wala magpabakuna tungod sa direktiba ni Presidente Rodrigo Duterte nga gitahas ngadto sa Department of Interior and Local Government nga limitahan ang kalihokan sa mga wala pay bakuna.
Ang listahan sa mga kapitan nga wala pa magpabakuna ipasa ni Rama ngadto sa DILG aron kahimoan og aksyon.
Niadtong miaging semana, ang DILG mipagawas og direktiba sa tanang LGUs nga palimitahan ang kalihokan sa mga wala pay bakuna batok Covid-19.
Si DILG Undersecretary for barangay affairs Martin Diño mipagawas og warning batok sa mga kapitan nga wala pa magpabakuna nunot aning pagpatuman na unya sa direktiba ni Duterte nga ilista ang mga residenteng walay bakuna. Si Diño miingon nga kun dili bakunado ang kapitan mahimo silang mo-resign o ba kaha moduso og leave of absence sa katungdanan hangtud dili pa hingpit mawala ang Covid-19 dinhi sa nasud.
“Nakakahiya kayo, Biro ninyo, kayo magpapatupad ng batas tapos kayo pala ‘di bakunado?” matud pang Diño sa interbyu kaniya sa Super Radyo dzBB.
Si Rama sa iyang bahin miingon nga kun buot huna-hunaon nakahibalo nang daan ang mga kapitan sa ilang responsibilidad ug dili na gani unta sila angayang pahinumdoman.
Nagkanayon si Rama nga kun opisyales gani, kinahanglan nga kahibalo usab kini mosunod sa mga programa sa gobiyerno ug usa na niini ang vaccination program. Matud ni Rama kun gusto sa opisyales og nindot nga liderato kinahanglan nga mosubay gyud kini sa awhag sa gobyerno. “Vaccination has proven to be an effective defense against the virus. Thus, kung wala pa gihapon mo, PaBakunaTa karon na! Pa-rehistro na sa PaBakunaTa.com, ug pwede na maka-walk-in sa atong mga vaccination centers,” nagkanayon si Rama.— IBM (BANATNEWS)
- Latest
