BFP sa San Fernando nipahigayon sa Oplan Ligtas na Pamayanan

CEBU, Philippines — Nagsugod na karon sa pagpahugot sa ilang kampaniya ang kabomberohan sa Lungsod sa San Fernando kalabot sa “Oplan Ligtas na Pamayanan” ilabi na nga nagsingabot na ang pasko.

Kini ang gitug-an ni Senior Fire Officer 1 Mary Anne Laude, pangulo sa Plan and Program sa Bureau of Fire Protection Lungsod.

Matud ni Laude nga aduna silay public address nga ipahigayon kaduha sulod sa usa ka adlaw aron pagpahibalo sa katawhan sa mga angayan nga buhaton aron kalikayan ang disgrasya. Gawas niini, aduna usab silay mga leaflet nga ipanghatag ilabi na ngadto sa mga nga taas ang populasyon.

Si Laude nagkanayon nga pito ka Barangay nga anaa sa coastal area ang ilang gitutokan tungod kay anaa ang mga dagkong patigayon ug baga usab nga duot sa katawhan.

Si Laude uban sa ilang fire marshal Fire Inspector Shoji Mendaros niawhag sa katawhan nga magmabinantayon kanunay ug dili mogamit sa mga substandard nga mga Christmas light nga ilang idayan-dayan niining nagsingabot nga pasko. BDB (BANATNEWS)