“Carbon Pasko Na!” gibuksan na kagahapon

CEBU, Philippines — Pormal na nga gibuksan kagahapon sa Kagamhanan sa Siyudad sa Sugbo ang ika-16 ka tuig nga “Carbon, Pasko Na!”nga gitambongan ni Mayor Michael Rama.

Suma pa sa usa sa mga opisyales sa mga vendors ug Konsehal sa Brgy. Ermita nga si Maria Pino nga wala gyuy puas ang paghatag og suporta sa Carbon vendors sa maong kalihokan.

Gipahigayon usab kagabii ang pagpasiga sa higanteng Christmas Tree sa merkado.

Ang “Carbon, Pasko Na 2021” nagpakita og usa ka labing madasigon nga Carbon nga adunay lain-laing mga christmas lights ug dekorasyon sa tibuok lugar.

Samtang mahibalik na karong tuiga ang pagpahigayon og Misa de Gallo diha sa Carbon Market nonot sa padayong pagminus sa kaso sa COVID-19.

Matud pa sa hepe sa Cebu City Emergency Operations Center nga si Konsehal Joel Garganera nga tumanon lang gyud sa manimbahay ang health protocols sama nalang sa pagsul-ob kanunay of face mask.

Samtang ang head sa Prevention Restoration Order Beautification and Enhancement (PROBE) ug overseer sa Market Operations Division nga si Raquel Arce nibutyag nga dunay i-destino nga mga tawo nga maoy mo-check sa temperatura sa manimbahay ug iseguro gyud nga mapatuman ang physical distancing.

Sa laing bahin sabotan pa sa kadagkuan sa simbahang katoliko ang pagpahigayon og misa de gallo diha sa mga basketball gym sa kabarangayan sa Dakbayan sa Talisay.

Kini aron mamenosan ang gidaghanon sa mga tawo nga motambong sa misa sa mga simbahan.

Si Police Lt. Col. Randy Caballes, hepe sa kapulisan nibutyag nga nahimo na nila ang panagsabot apan sa ikatulong tigom gusto ni mayor Gerald Anthony “Samsam” Gullas nga mopresentar ang kadagkuan sa simbahan sa ilahang plano sa pagkontrolar sa manimbahay ingon man sa trapiko. Gabriel C. Bonjoc/MEL (BANATNEWS)