Bag-ong health center sa Olango gisubhan

CEBU, Philippines — Gisubhan na niadtong miaging adlaw ang duha ka andana nga building sa bag-ong health center sa Barangay Caw-oy  sa Isla sa Olango  sa Dakbayan sa Lapu-Lapu nga gigastohan og mokabat sa  P2.5  milyones.         

Natigayon ang pagpatukod sa nahisgotang proyekto pinaagi usab pag-abag sa buhatan ni Kongresista Paz Radaza.

Atol sa blessing ceremony nga gitambongan ni Radaza walay bisan usa sa mga barangay opisyal nga mitambong sa maong kalihokan.                               

Hinuon wala masayri ang hinungdan sa wala pagtambong sa mga barangay opisyal sa maong kalihokan apan gituohan nga tungod sa politika.                  

“Mapasalamaton kaayo ko og dako sa mga lumulupyo kay mas gipatigbabaw nila ang ilang tagsa ka katungod sa pag dawat sa ilang bag-o nga two-storey building nga health center ni Kongresista Radaza pa sa iyang pamahayag.                       

Makaluluoy ang  katawhan sa Barangay Caw-oy tungod kay naka nakabaton kini og mga barangay officials nga walay pagtahod ug gipakita hinuon nila ang ngil-ad nga pamatasan isip mga opisyales sa barangay.”

Samtang sa laing bahin, mihatag og P100, 000 si Radaza alang sa 41 ka mga fisherfolks sa Barangay Caw-oy gikan sa iyang personal nga panudlanan.

Human nga nasayran ni Radaza nga galisod ang mga mananagat karon sa ilang kita sa pagpangisda, iya kining gihatagan og puhunan para sa pagpalit sa ilang kaugalingong Panggal nga maoy magamit nila aron makakuha og ubay-ubay nga isda ug bahinon kini sa grupo. Nanghatag usab si Radaza og tag 3 kilos nga bugas ngadto sa 134 ka mga residenti sa susama nga barangay di-in mga asawa usab sila sa mga mananagat. MEL   (BANATNEWS)