Kapolisan sa Minglanilla naglisod sa imbestigasyon

CEBU, Philippines — Giangkon sa kapolisan sa Lungsod sa Minglanilla nga nakasinati sila og kalisdanan sa pagsubay sa pagpatay sa usa ka negosyante niadtong nilabay nga semana.

Kini human ang asawa ni Jimmy Hernandez wala niatubang sa mga operatiba.

Si Police Major William Homoc, hepe sa Minglanilla Police Station nibutyag nga iyang gipaadto sa iyang operatiba ang asawa ni Hernandez apan wala kini niatubang sa mga polis.

Gikataho nga si Hernandez ug ang iyang asawa sakay sa ilang sakyanan  diin paingon na unta sila nga mopauli na sa ilahang balay sa Dakbayan sa Mandaue dihang gipauwanan og bala sa duha ka kriminal kinsa sakay og motorsiklo diha sa Barangay Lipata sa nahisgutang lungsod.

Daling gitabang ang biktima apan nakabsan gyud kini sa iyang kinabuhi.

Adunay footage sa Close Circuit Television nga nakuha sa kapolisan diha sa lugar apan dili pa kini igo sa pag-ila sa mga mamumuno.

Nagkanayon si Homoc nga ila unta nga susihon ang cellphone sa biktima kong aduna ba kini mga hulga sa iyang kinabuhi sa wala pa kini gipatay.

Sa pagkakaron, ang kapolisan magsalig una sa uban pa nga kuha sa CCTV samtang ila usab kining isumiter ngadto sa cybercrime ang kopya kong mahimo pa ba nga ipa-enhance ang kuha sa camera. BDB (BANATNEWS)