Gidaro sa trak, lima patay

CEBU, Philippines — Lima ang patay samtang 15 ka tawo ang naangol sa dihang gidaro sa usa ka dumptruck ang mga sakyanan diha N. Bacalso Avenue sa Brgy. Lawaan III sa Dakbayan sa Talisay kagahapon sa buntag.

Ang drayber sa dumptruck nga namatay sab mao si Benchin Udtohan, lumad nga taga Zamboanga Del Sur.  Usa ka six- wheeler truck, lima ka sakyanan; lima ka motorsiklo, usa ka bisekleta, ug usa ka ten-wheeler truck ang nadasmagan samtang kini padung sa habagatan.

Samtang ang iyang naharos nga nangamatay sab mao sila si Jose Wendel Cataquez, 66; San Pedro Paquito, 29; Glenn Baclay, 24;ug usa babayeng wala pa mailhi.

Ang mga nasamdan mao sila si Nelo Rublica, 35; Rey Discos, 47; Evan Miguel Reyna, 15; ug si San Pedro Paquito Sr. ning pagsulat sa balita gikolekta pa ang mga pangalan sa ubang nangaangol.

Ang disgrasya nakamugna ug grabeng kahuot sa dagan sa trapiko padulong ngadto sa habagatan nga bahin sa probinsya sa sugbo.

Usa sa mga nakasaksi sa maong disgrasya nitug-an nga kusog kaayo ang dagan sa maong trak nga kargado og filling materials.

Usa ka Hazel Busa, kinsa usa sa mga naigo sa dumptruck nihulagway nga nagbiyahe silang tanan paingon sa habagatan sa dihang nakadungog siya og sirbato sa iyang luyo.

Iyang nabantayan nga nag zigzag ang dagan sa maong trak ug kusog kini nga nakapadagan.

Unang naigo mao ang multicab nga naa sa iyang atubangan hangtud ug sunod nga naigo sa Beep nga pasaheroan ug sa uban pang mga sakyanan nga nakaparada sa daplin sa dalan hinungdan sa pagkaigo sa daghang mga tawo nga nagbarug kilid sa karsada. Si Police Master Sergeant Reynaldo Tañeca sa Traffic Division nibutyag nga tulo ka lalaki ug usa ka babaye ang nangamatay diha-diha. Matud pa ni Tañeca nga ang impormasyon nga ilang nadawat, gialegar nga nakiglumba sa laing dumptruck si Udtohan.— Rowena Capistrano/IBM (BANATNEWS)