Pagpahigayon sa night market kinahanglang tukion pa —Rama
CEBU, Philippines — Si Cebu City Mayor Michael Rama walay pagsupak sa tinguha sa vendors nga ibalik ang night market apan iyahang giklaro nga angayan kining tukion sa dili pa ipahigayon. Sama sa kinsay paapilon sa night market ingon man ang pagtuman sa minimum health standards ilabi na nga anaa pa ang hulga sa COVID-19.
“All of these should be covered by a contingency plan, reviewed by EOC and I will make the final approval mao gyud na, kay mangabli unya siradoan kay nagkiat, wala nituman”, matud ni Rama.
Sayo pa, ang Prevention Restoration Order Beautification Enhancement (PROBE) nibutyag nga ang vendors nisumetir og proposal kalabot sa night market diin usa sa ilahang gisugyot mao nga mga fully vaccinated lang ang paapilon sa night market.
Sa oras sa pagsuwat niining balita, si Rama nagkanayon nga wala pa maabot sa iyang buhatan ang proposal nga gisumetir sa mga manindahay.
Ang night market kon ugaling tugotan sa kagamhanan sa siyudad anha kini ibutang sa dalan Colon diin magsugod sila sa pagpaninda sa alas 6;00 sa gabii hangtud sa alas 3:00 sa kadlawon.
Sa niaging tuig walay gipahigayon nga night market tungod kay wala kini tugoti sa kagamhanan sa siyudad gumikan sa hulga sa COVID-19. —BDB (BANATNEWS)
- Latest