DPWH nisaad nga sulbaron ang problema sa karsada sa Manipis

CEBU, Philippines — Paninguhaon sa Department of Public Works and Highways (DPWH) nga masulbad ang suliran sa karsada sa Barangay Manipis, Dakbayan sa Talisay sa dili pa ang pasko.

Kini maoy gisaad sa maong ahensiya atol sa ilang panagtagbo tali ni Kapitan Joselito Laurente ug Jonathan Tumulak, hepe sa City of Talisay-Traffic Operation and Development Authority.

Si Tumulak nagkanayon nga adunay backhoe nga nagtrabaho sa ibabaw nga bahin sa bukid aron sa pagkabkab sa yuta nga delikado nga modahili.

Sundon usab kini sa mga dagkong truck nga maoy mohipos sa mga yuta ug bato nga nakaali sa karsada.

Matud ni Tumulak nga risgo gihapon kong mopugos og agi ang motorista hinungdan nga anaa iyang mga sakop nga mobabag sa mamugos sa pag-agi diha sa maong lugar. Ang Sitio Langoyon ug Campo 5 maoy mga lugar sa Manipis nga notado sa pahdahili sa yuta.

Adunay higayon nga buksan ang karsada alang sa mga residente lang apan mobalik ra usab og sira tungod sa lain na usab nga paglihok sa kabukiran. (Gabriel C. Bonjoc/BDB)

Mga biktima sa sunog gidasig ni Palma

Si Archbishop Jose Palma sa Archdiocese of Cebu nidasig sa mga biktima sa sunog diha sa Sitio lawis Alaska, Barangay Mambaling, Dakbayan sa Sugbo nga dili mawagtangan og paglaom bisan sa mga giatubang nilang kalisdanan karon.

Matud ni Palma nga sakit man pamalandongon ang nahitabo nga sunog nga nibiktima ug daghang tawo ilabi pa niining panahon sa pandemiya apan gipaniguro sa Cebu Caritas nga makahatag og hinabang.

Si Palma nagkanayon nga makig-alayon siya ngadto kang Padre Alex Cola Jr., presidente sa Cebu Caritas Inc. ug kasamtangan nga chairman sa Commission on Service aron makapadangat og tabang ngadto sa mga nabiktima sa sunog.

Gidasig ni Palma ang mga nabiktima sa sunog nga dili mawagtangan og paglaom ug padayon gihapon ang pagsalig nila ngadto sa Ginoo tungod kay adunay grasya nga modagayday ngadtoi kanila.

Gikataho nga 900 ka pamilya ang apektado sa sunog nga niulbo diha sa nahisgotang lugar niadtong Biyernes. BDB (BANATNEWS)