Kawani sa CH nga nangilkil taktakon

CEBU, Philippines — Taktakon sa trabaho kadtong kawani sa Market Operations Division nga gidakop sa mga sakop sa National Bureau of Investigation tungod sa reklamong pagpangilkil ngadto sa mga vendors sa Carbon Public Market matud pang Cebu City Mayor Michael Rama.

“Of course, if it’s an entrapment. What else has to be done? Next thing is termination,”matud ni Rama.

Ang gidakop mao si Kara Mae Bargamento, usa ka administrative aide III sa City Hall, naaktohan kining nidawat sa marked-money gikan sa ahente sa NBI nga matud pa maoy iyang gipangayo gikan sa vendor. Si Bargamento gipasanginlang nangayo og tag P100 mil matag vendor aron sila mahatagan og stall sa bag-ong tukorong edipisyo nga kabahin sa Carbon Public Market modernization project sa siyudad ug sa Megawide.

Gikatahong 50 ka mga vendors ang personal nga naka-transaksyon ni Bargamento base sa giluwatang pamahayag nilang market supervisor Marigen Diano ug Raquel Arce, ang pangulo Prevention, Restoration, Order, Beautification and Enhancement (PROBE) team.

Matud sa mayor, mao kini ang hinungdan nga gusto niyang maglusad og performance evaluation sa mga kawani sa siyudad karong siya nay mayor.

Sa sayo pa, dunay gibutang nga mga kasaligang tawo si Rama nga gipatutok sa 27 ka departamento sa City Hall. “No one should be afraid, for as long as dili mo kawatan, hugawan, tapulan, pala-away, tsismoso, intrigero, bugal-bugalon, tigpamentaha, kwentador o’ moihap og trabaho, isipan ug empleyado nga wala diay nahibaw-an ug nakama-ohan,” matud pang Rama. (BANAT NEWS)