Port expansion project sa CPA gi-inagurahan
CEBU, Philippines — Gi-inagurahan sa Department of Transportation ug sa Cebu Port Authority ang bag-o lang natapos nga port expansion project sa Berths 7-10, Cebu Baseport dinhi sa Dakbayan sa Sugbo.
Ang P989 million nga kantidad sa proyekto gigahinan og pundo sa CPA nga gitumong aron pag-atiman sa gipaabot nga pag-umento sa granty cranes ug aron usab pagkab-ot og mubo nga oras sa cargo operations.
Naglakip ang proyekto sa construction sa 40-meter nga gilapdon ug 310-meter nga gitas-on sa concrete deck ug back-up/operation area, port lighting system, complete mooring and docking facilities ug gantry crane rails.
Ang gipalapdan nga pantalan gipaabot nga maka-accommodate sa nagsaka nga gidaghanon sa mga sakyanan sa dagat ug mas mapalambo ang cargo handling capacity segun sa pamahayag sa CPA.
Sa iyang mensahe, suma pa ni CPA General Manager Miole nga ang pagka human sa maong multi-million port infrastructure project usa ka dakung kalamposan sa CPA ubos sa Build, Build, Build Program sa Duterte administration.
Gipasalig usab ni Miole nga padayon sila nga mohimo og kalambuan sa mga pantalan aron masiguro ang kaluwas sa byahe sa mga barko ug mga pasahero.
Si DOTr Undersecretary for Maritime ADM George Ursabia Usec Ursabia, sa ngalan ni DOTr Secretary Arthur Tugade mipahalipay sa mga officials ug management sa CPA gumikan sa kalamposan sa port expansion project.
Nagkanayon si Ursabia nga ang maong proyekto nagsuporta sa tinguha sa DOTr nga maghatag og serbisyo sa mga pantalan nga adunay global standards.
Ang phase 1 sa expansion project nga dunay gahin nga P339-million nagsugod niadtong August, 2017 ug nakompleto niadtong January 2019.
Samtang ang phase 2 sa proyekto nagsugod niadtong February 2020 nga dunay gahin nga P600 million ug giturn-over kini ngadto sa CPA niadtong October 2021. (BANAT NEWS)
- Latest