Menor ug senior citizens makasulod sa sementeryo sa Naga

CEBU, Philippines — Ang mga nag-edad og 15 ngadto sa 65-anyos  tugotan sa lokal nga kagamhanan sa Siyudad sa Naga nga makabisita sa sementeryo sa siyudad sa pagsaulog sa adlaw sa mga Santos ug Kalag.

Ang siyudad nituman sa mando sa Inter-Agency Task Force nga pasirad-an ang mga sementeryo sugod sa Oktubre 29 hangtud sa Nobiyemnre 2, 2021.

Apan bukas ang mga sementeryo sa Oktubre 23 hangtudd Oktubre 28 ug Nobiyembre 3 hangtud Nobiyembre 8, 2021.

Giawhag sa LGU ang mga mobisita sa mga sam-ang hatagan lang kini og usa ka oras aron mahatagan usab og oras ang uban nga makabisita ug dili magtapok ang mga tawo.

Samtang sa Siyudad sa Danao si Mayor Nito Durano nipagawas og executive order alang sa pagpasirado sa ilang mga pampubliko ug pribado nga sementeryo sa siyudad sugod sa Oktubre 29 hangtud Nobiyemre 2, 2021.

Samtang sa Dakbayan sa Talisay 500 ka tawo ang magbantay sa mga sam-ang sa siyduad. Kini aron masiguro nga walay makasulod sugod sa Oktubre 29 ngadto sa Nobiyembre 2, 2021.

Si Police Lieutenant Colonel Gerard Ace Pelare, hepe sa kapolisan sa siyudad nagkanayon nga kapin sa 100 niya ka sakop ang iplastada diha sa pito ka sementeryo ug kapin sa 200 ka force multiplier.

Si Mayor Gerald Anthony “Samsam” Gullas Jr. nibutyag nga anaa usab ang presensiya sa military atol sa maong kasaulogan ug kapin sa 100 ka sakop City of Talisay-Traffic Operation Development Authority ang magmando sa trapiko ug mga tanod.

Subay niini, ang opisyales sa Barangay Ocaña, Dakbayan sa Carcar magpaabot pa sa direktiba sa ipagawas nga kamandoan ni Mayor Mercy Apura kong buksan ba ang sementeryo o dili.

Si Kapitan Dario Ramos nagkanayon nga adunay duha ka sam-ang ang nahimutang sa ilang barangay diin usa ang pampubliko ug usa usab ang pribado.

Sa Lungsod sa Consolacion,  giawhag sa kagamhanan  sa lungsod  ang mga molupyo sa kabarangayan sa pagsunod sa schedule sa adlaw sa matag barangay  alang sa ilang pagbisita sa mga sementeryo.             

Samtang sa Dakbayan sa Sugbo, ablihan o dili ang mga sam-ang sa siyudad gusto ni Cebu City Acting Mayor Michael Rama nga makapangandam ang siyudad.

Samtang si Konsehal Joel Garganera, pangulo sa Cebu City Emergency Operations Center (EOC) nga sa Nobiyembre 1 ug 2 ra gyud ma-apply ang lagda nga fully vaccinated lang nga mga indbidwal nga mahimong makasulod sa pampubliko ug pribadong sementeryo.

Nunot usab niini, ang Cebu City Fire Office (CCFO) nihimo usab og preparasyo aron masiguro nga malikayan ang mga dili maayong panghitabo sama sa sunog.

Matud ni Senior Fire Officer 1 Wendel Villanueva nga ang Cebu City Fire Office nag-deploy na og mga fire truck sa mga sam-ang sa siyudad aron makaresponde kon adunay mga emerhensiya.  — Gabriel C. Bonjoc, Rowena D. Capistrano, Romeo T. Limpangog,  Decemay P. Padilla ug Sanden J. Anadia/BDB (BANATNEWS)