Duha ka motor nagbangga, backrider patay

CEBU, Philippines — Patay ang backrider sa motorsiklo human sila nabanggaan og laing motorsiklo diha sa N. Bacalso Avenue, Barangay Bulacao, Dakbayan sa Talisay niadtong Sabado sa alas 11:30 sa gabii.

Si Ryan Castañares, 32 anyos nga taga Pardo, Siyudad sa Sugbo nagmaneho sa iyang motorsiklo paingon sa siyudad.

Samtang si Frank Banguis, 46 anyos nagmaneho sab sa iyang motorsiklo uban ni Robelyn Pacquiao, 44 anyos nga pulos taga lungsod sa Minglanilla.

Sa inisyal nga imbistigasyon sa kapulisan nasuta nga nilabang sa karsada sila si Baguis ug si Pacquiao sakay sa ilang motorsiklo dihang nabanggaan sa motor nga gimaneho ni Castañares.

Atol sa aksidente nangalagpot ang tulo ka biktima sa ilang gisakyan nga motorsiklo apan si Pacquiao ang nakaangkon og grabeng bun-og sa lawas nga gidali og dala sa tambalanan apan nakabsan kini sa iyang kinabuhi.

Si Banguis ang nitahan usab sa iyang kaugalingon ngadto sa kapulisan human sa akisdente. Gabriel C. Bonjoc/MEL

Mga sementeryo sa Talisay sirad-an panahon sa Kalag-kalag

Nahukman sa kagamhanan sa Dakbayan sa Talisay nga sirad-an ang mga sementeryo panahon sa obserbasyon sa adlaw sa mga kalag ug Santos.

Gipahibawo kini ni Mayor Gerald Anthony “Samsam” Gullas human sa ilang tigom sa kapolisan, barangay opisyales, kaparian ug mga opisyales sa siyudad.

Suma pa ni Gullas nga ilang tumanon ang kamanduan sa Department of Interior and Local Government (DILG) aron kalikayan ang pagtapok-tapok nga maoy hinungdan sa pagtinakdanay sa COVID-19.

Sugod sa Oktubre 29 hangtud sa Nobyembre 2 walay pasudlon sa pito ka menteryo ma pribado ug pampubliko.

Hinuon tugotan lang nila sa nahabiling mga adlaw nga makapanagkot o makaduaw ang Talisaynon sa ilang minahal sa kinabuhi nga mitaliwan na sa laing kalibutan.

Gitugtan nila nga makasulod ang mga kabataan ug mga edaran apan 50 porsyento lang ang magdungan nga makasud.

Gibawal nila ang mga hait nga hinagiban, ilimnong makahubog ug sound system sa sulod sa sementeryo.

Gihangyo sab ang tanan nga motuman sa health protocol sama sa pagsul-ob og face mask ug pagtuman sa social distancing. MEL (BANATNEWS)