Kaso sa COVID-19 sa Cebu City padayong nikunhod

CEBU, Philippines — Padayon nga nagkaubos ang positivity rate sa kaso sa COVID-19 sa Siyudad sa Sugbo sulod na sa tulo ka semana.

Matud sa hepe sa Cebu City Emergency Operations Center Konsehal Joel Garganera nga mao kini ang maayong sinyales alang sa posibleng pagpaloag  unya sa restrictions sa travel requirements, pagpataas sa kapasidad nga  mahimong masudlan sa mga kustomer sa nagkadaiyang establisamento, pagtugot sa contact sports  alang sa mga bakunado nga indbidwal ug uban pa.

Base sa datos sa EOC nga gipresentar sa EOC sa Oktubre 23, 2021 aduna na lay 288 ka active cases ang siyudad.

Ang 20 nga bag-ong kaso niini naggikan sa 851 ka indbidwal nga gi-test diin sa maong gidaghanon 2.35 porsyento niini ang positibo. Sa maong petsa, adunay siyam ang natala nga namatay apan naggikan kini sa niaging duha ka semana ug nalangan lang ang pag-report.

Alang usab sa mga menor nga nag-edad og 12 ngadto sa17-anyos, posibleng tugotan na kini nga maka-dine in sulod sa mga enclosed nga kan-anan kon mabakunahan na kini.

Dugang ni Garganera nga mohimo ra og direktiba si Acting Mayor Michael Rama kalabot sa posible nila nga mga rekomendasyon. (BDB) (BANATNEWS)