Tindahan og LPG nga tapad sa litsonan posibleng ipasirado
CEBU, Philippines — Diriyot masira ang usa ka tindahan nga namaligya og Liquefied Petroleum Gas (LPG) diha sa Barangay Tanke, Dakbayan sa Talisay.
Kini human nasakpan sa kabomberohan sa siyudad nga katapad niini ang tindahan og litson manok.
Si SFO3 Guiller Pegarido sa Talisay City Fire Station nagkanayon nga duha ka tindahan ang nabutang sa peligro.
Matud ni Pegarido nga ang kainit sa litsonan ug ang produkto nga LPG kuyaw nga mag-abot ug mao na unya ang hinungdan sa sunog. Gibutyag ni Pegarido nga katulo na kahigayon sila nakasita sa maong tindahan apan padayon kini nga namaligya og LPG.
Ilang nasuta nga aduna lang kini temporary permit ang maong tindahan ug wala pa kini permiso gikan sa Department of Energy (DOE) ug sa ilang buhatan.
Dugang ni Pegarido nga ilaha usab kining sutaon sa licensing office ang pagpamaligya sa maong tindahan aron maklaro ang mga papeles niini.
Ug kong dili motuman sa ilang pagbadlong ang maong tindahan posibleng ipasirado kini. BDB (BANATNEWS)
- Latest