Wala pasakya kay way swab test

CEBU, Philippines — Nakit-an na ang duha ka mga batan-ong babaye nga gikatahong na missing sud sa pipila ka mga adlaw. Kini human ang duha wala pasakya sa mga barko kay walay napakitang negative RT-PCR test.

Ang duha nga nag-edad 12 anyos nga taga Barangay Lawaan 1, Dakbayan sa Talisay ug 13- anyos nga taga Conception, Suba, Syudad sa Sugbu didto na nakit-an sa kapolisan uban sa ilang ginikanan sa lungsod sa Samboan.

Ang duha katapusang nakit-an nga nibiya sa ilang panimay niadtong Lunes sa hapon. Matud pa ni Police Corporal Eleazar Belciña sa Talisay City Police Station nga nahinabi sa dySS Super Radyo, human sila nakadawat og impormasyon bahin sa nahimutangan sa duha, dali nilang giadto ang Bato, San Sebastian sa lungsod sa Samboan.

Ang duha gikatahong ni-estar sa usa ka lodging house. Alas 2:20 kagahapon sa kaadlawon dihang naabot ang mga ginikanan sa mga dalagita uban sa mga polis. Ang duha gikatahong naabot sa Samboan niadtong Martes kay gusto unta silang motabok ngadto sa Negros, apan wala sila makalarga kay wala silay mga papeles. Tungod niini nanghangyo sila sa maong lodging house aron makapuyo.

Matud pang Belciña, ang 13-anyos  nakipuyo na sa iyang mga iyaan kay wala na kini ginikanan.

Gikatahong “gikapoy” na kini sa mga trabaho sa ilaha maong nakadesider nga mobiya ug mobakasyon. Ang duha dunay dalang P15 mil.

Samtang ang 12-anyos mitug-an sa kapolisan nga nahiubos kini sa iyang mga ginikanan kay lagi dili kaayo matagad gumikan sa panginabuhi.

Sa duha, ang 13-anyos maoy dunay tinigom kay nagdawatan kini og financial assistance gikan sa gobyerno kay kini  usa ka Person with Disability (PWD).

Si Belciña niingon nga nakuha nila ang cellphone sa 13-anyos aron ipatan-aw sa PNP Cybercrime Unit aron pagsusi kun duna bay kontak nga taga Negros kay basin og gi-rekrut ang duha sa mga walong pundok.

Ang duha gikatakdang ipaubos sa counseling.

Ang inahan sa 12-anyos nagpasalamat sa tanan nga nitabang kanila sa pagpangita sa iyang anak ug sa amiga niini.

Ang duha wala pasakya sa barko gikan Toledo City padung sa Negros kay wala sila makapresentar og RT-PCR test mao nga namasin sila sa Samboan apan wala gihapon sila pasakya tungod samang rason.

Ang RT-PCR test o swab test usa sa mga rekisitos nga pangitaon sa mga LGUs sa mga biyahidor nga mosulod sa ilang lugar agi og panagang gikan sa Covid-19. Hinuon nangayo og pasaylo ang ginikanan sa 12-anyos kay nahiubos kini kanila.— IBM (BANATNEWS)