Problema sa karsada sa Manipis dili sayon sulbaron

CEBU, Philippines — Dili sayon sulbaron ang suliran sa karsada sa Manipis, Dakbayan sa Talisay nga nakasinate og pagdahili sa bato ug yuta.

Kini maoy gibutyag ni Alvin Santillana, pangu sa City Disaster Risk Reduction and Management Office (CDRRMO) sa dihang nibisita ang taga Department of Public Works and Highways (DPWH) sa maong dapit.

Ang Provincial Environment and Natural Resources (PENRO) nirekomendar nga sirhan ang naandan nga karsada ug mohimo og laing ka agi-an sama sa paghimo og taytayan.

Apan si Santillana nitataw nga nakit-an sa taga DPWH nga ang paghimo og taytayan nagkinahanglan og dako nga pundo ug taas nga panahon.

Si Jonathan Tumulak, traffic czar sa siyudad nihangyo sa taga DPWH nga unta sila makahatag og bana-bana nga adlaw kung kanus-a mahimo ma agi-an pagbalik ang karsada sa Manipis nga molapos sa Toledo ug bukirang barangay sa Siyudad sa Sugbo.

Tumong ni Tumulak aron makapangita og paagi ang mga motorista kun ugaling dili pa gyud maagian og balik ang Manipis.

“Mas maayo makahibawo daan kun kanus-a aron ang tawo ilabi na mga molupyo sa dapit makahibawo kung unsa ilang buhaton sa mga adlaw nga di pa gyud pa agi-an,”segun ni Tumulak.

Kahinumduman gisirad-an ang karsada sa sitio Languyon, barangay Manipis human nakasinate og pagdahili sa bato ug yuta ang maong dapit. —MEL (BANATNEWS)