Cebu City mag-umol og Barangay Internet Access Points
CEBU, Philippines — Ang konseho sa Dakbayan sa Sugbo nipalabang og ordinansa kabahin sa pag-umol og Barangay Internet Access Points diha sa 80 ka barangay sa siyudad.
Si Konsehal Eduardo “Edu” Rama maoy nangamahan sa nanisgutang ordinansa diin libre ang maong internet services ngadto sa katawhan.
Tumong niini nga makakonektar ang mga tawo sayon nga access sa impormasyon ug mga serbisyo nga gipaagi diha sa internet.
Makaabag usab kini sa mga tawo nga mag-research alang sa nagkadaiyang impormasyon uf nahaom usab kini sa panahon diin online sa ilang pag-eskwela ang mga tinun-an.
Nasayran nga ang kagamhanan sa Siyudad sa Sugbo naka-establisar na og pasiuna nga internet access points sa Barangay Basak San Nicolas, Tisa, Calamba, Cogon Pardo, Duljo Fatima, Inayawan, Mambaling, Pasil, Punta Princessa, San Nicolas Proper, Sawang Calero, Sinsin, Suba, ug Sudlon II.
Gibutyag ni Rama nga sa wala pa napasar ang maong ordinansa nihimo na usab siya og pilot sa maong serbisyo ngadto sa 20 ka barangay gamit ang iyang personal nga pundo.
Ang budget sa maong proyekto adto ipaagi sa Management Information and Computer Services Department alang sa pagmentinar sa serbisyo. — /BDB (BANAT NEWS)
- Latest