13 ka kandidato sa Probinsiya sa Sugbo walay mga kontra

CEBU, Philippines — Lima ang kandidato sa pagkamayor ug walo sa pagkabise mayor sa 52 ka lungsod ug siyudad sa Probinsiya sa Sugbo apil na ang Mandaue City ang walay kontra sa 2022 elections.

Base sa unofficial list sa Comelec sa Probinsya sa Sugbo apil sa mga walay kontra sa mayoral race mao sila si Terence Blanco ubos sa One Cebu/NPC sa Lungsod sa Ronda; Democrito Diamante nga nilansar pagka independente sa Lungsod sa Tuburan; Ace Binghay sa One Cebu sa Lungsod sa Balamban; Joie Genese Derama sa One Cebu sa Lungsod sa Boljoon ug Roy Vincent Singco ubos sa One Cebu sa Lungsod sa Ginatilan.

Samtang sa bise mayor, walay kontra sila si Rocky Gabatan ubos sa One Cebu / NPC sa lungsod sa Ronda; Mariano Laude ubos sa Nacionalista Party sa Lungsod sa Sibonga; Danilo Diamante nga nilansar pagka-independente sa Lungsod sa Tuburan; Neil Tracy Plando sa One Cebu sa Lungsod sa Alcoy; Raisa Moreno ubos sa One Cebu sa Lungsod sa Aloguinsan; Alex Binghay sa One Cebu sa Lungsod sa Balamban; Ervin Villanueva sa One Cebu sa Lungsod sa Boljoon ug William Lagahid  ubos sa PDP-Laban sa Lungsod sa Dalaguete.

Ang Comelec nipagawas sa official list sa mga kandidato alang sa 2022 elections pinaagi sa website niini kagahapon. — /BDB (BANAT NEWS)